Aýyldyq jerlerdi sýmen jabdyqtaýda artta qalǵan óńirler ataldy
NUR-SULTAN. QazAqparat - Elimizde aýyldyq jerlerdi sýmen jabdyqtaýda eń tómengi kórsetkishter Pavlodar, Qostanaı, Batys Qazaqstan oblystarynda baıqalyp otyr. Bul týraly QR Indýstrııa jáne ınfraqurylymdyq damý mınıstrligi Qurylys jáne turǵyn-úı kommýnaldyq sharýashylyǵy isteri komıtetiniń tóraǵasy Marhabat Jaıymbetov málim etti, dep habarlaıdy QazAqparat tilshisi.
«Bizdiń mınıstrliktiń basty mindetteriniń biri - halyqty sapaly aýyz sýmen jáne sý júıelerimen qamtamasyz etý. Elbasynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýy aıasynda byltyr aýyldy jerlerdi sýmen jabdyqtaýǵa 100 mlrd teńgeden astam qarajat bólindi. Onyń ishinde respýblıkalyq bıýdjetten aýyl ishindegi júıelerge - 69,6 mlrd teńge bólinip otyr», - dedi Marhabat Jaıymbetov OKQ-da ótken baspasóz máslıhatynda.
Komıtet basshysynyń aıtýyna qaraǵanda, 2018 jyly eldegi 6 499 aýyldyń 3 892-i (barlyq aýyldyń 59,9 paıyzy) sýmen jabdyqtalǵan. Qazirgi ýaqytta aýyl halqynyń 84,4 paıyzy nemese 6,5 mln adam ortalyqtandyrylǵan sýmen jabdyqtaý júıesine qol jetkizip otyr.
«Qalalyq jerlerde 10 mln adam (qala halqynyń 94,5 paıyzy) ortalyqtandyrylǵan sýmen qamtamasyz etildi. Jalpy Qazaqstan halqynyń 90,2 paıyzy nemese 16,5 mln adam ortalyqtandyrylǵan sýmen jabdyqtaý júıesimen qamtamasyz etilgen. Jobalardy iske asyrýdyń oń áserine jáne respýblıka boıynsha kórsetkishterdiń artýyna qaramastan jekelegen óńirlerde turǵyndardy aýyz sýmen qamtamasyz etý boıynsha teńsizdik baıqalýda. Aýyldyq jerlerdi sýmen jabdyqtaý boıynsha reıtıngte eń tómengi kórsetkish Pavlodar (29,7 paıyz), Qostanaı (31,4 paıyz), Batys Qazaqstan (46 paıyz) oblystaryna tıesili», - dep atap ótti Marhabat Jaıymbetov.
Onyń aıtýynsha, qala turǵyndaryn ortalyqtandyrylǵan sýmen qamtamasyz etýde eń tómengi kórsetkish Jambyl (86,6 paıyz) jáne Aqmola (86 paıyz) oblystarynyń enshisinde.
