Aýyldyq jerlerdegi poshta bólimshelerinde kórsetiletin qyzmetter sany artady

ASTANA. QazAqparat - Aýyldyq jerlerdegi poshta bólimshelerinde kórsetiletin qyzmetter kólemi artady. Bul týraly búgin Ortalyq kommýnıkatsııalar qyzmetindegi brıfıngte «Qazposhta» AQ basqarma tóraǵasy Baǵdat Mýsın málim etti.

«Elimizde 3 137 poshta bólimshesi bolsa, onyń 70 paıyzy aýyldyq jerlerde ornalasqan. Aýyldardaǵy bólimshelerge toqtalatyn bolsaq, júrgizilgen taldaý barysynda olardyń tek eki bazalyq qyzmetti ǵana kórsetýinen tıimsiz bolyp otyrǵanyn aıqyndadyq. ıAǵnı, birinshisi - tólemderdi qabyldaý men zeınetaqyny berý boıynsha qarjylyq qyzmet, al ekinshisi - turǵyndarǵa gazetterdi jetkizý. Atap aıtqanda, bizdiń qyzmetker aptasyna 1-2 kún ǵana jumyspen qamtylǵan. Osy turǵyda kórsetiletin qyzmetter az, sondaı-aq eldi mekenderde poshta ǵımarattaryn qarjylandyrý tıimsiz bolyp tur», - dep toqtaldy ol. B.Mýsınniń sózine qaraǵanda, bul baǵytta keńesshilermen tıisti talqylaýlar júrgizilip, poshta jelilerinde qyzmet túrlerin kóbeıtý sheshimi jasaldy. «Elbasyǵa transformatsııa forýmy barysynda aýyldyq bólimshelerdi qysqartpaıtynymyzdy baıandaǵan bolatynbyz. Sondyqtan da biz jańa qyzmetterdi zerdelep jatyrmyz. Qanatqaqty rejimde elimizdiń aýyldyq jerlerindegi 30 poshta bólimshesinde Halyq qyzmet kórsetý ortalyǵy qyzmetteri iske asyrylýda. Budan keıin temir jol jelileri jaqyn eldi mekenderde temir jol bıletterin satýdy uıymdastyrmaqpyz. Munymen qosa, saqtandyrý jáne basqa da qajetti qyzmetterdi qamtýdy qarastyryp jatyrmyz», - dedi basqarma tóraǵasy.