Aýyldyq jerlerdegi poshta bólimderi jabylmaıdy - «Qazposhta» AQ basqarma tóraǵasy

ASTANA. QazAqparat - Aýyldyq jerlerdegi poshta bólimderi jabylmaıdy. Bul týraly búgin Ortalyq kommýnıkatsııalar qyzmetinde ótken brıfıngte «Qazposhta» AQ basqarma tóraǵasy Ashat Beısenbaev aıtty.

«El aýzynda aýyldyq poshta bólimderi jappaı jabylýy múmkin degen kúdik bar. Halyqtyń alańdaýshylyǵyn túsinemin. Sondyqtan aýyldarda poshta bólimderiniń jabylmaıtynyn naqtylap aıtqym keledi. Kerisinshe, búginde ár aýyldaǵy poshta bóliminde kórsetiletin qosymsha qyzmet túrlerin kóbeıtý úshin jumystar jasap jatyrmyz», - dep atap ótti ol.

Onyń aıtýynsha, dál osy aýyldyq jerlerdegi poshta bólimshelerin damytýdyń arnaıy baǵdarlamasy qabyldanǵan. Onda bólimshelerdegi kórsetiletin qyzmet sapasyn arttyrý ǵana emes, sonymen qatar qosymsha qyzmetter kórsetý máselesi de qarastyrylǵan.