Aýyldyq jerlerdegi ınfraqurylym máselesin sheshýge 800 mlrd teńge bólinedi

NUR-SULTAN. QazAqparat – Aýyldyq jerlerdegi ınfraqurylym máselesin sheshý úshin 5 jyldyń ishinde 800 mlrd teńge bólinedi. Bul týraly Úkimet otyrysynda QR Ulttyq ekonomıka mınıstri Áset Erǵalıev aıtty, dep habarlaıdy QazAqparat tilshisi.

«Aýyldyq jerlerdegi ınfraqurylym máselelerin sheshý úshin 5 jyldyń ishinde 800 mlrd teńge bólinedi. Bul óz kezeginde 3,5 myńnan astam aýyldaǵy 7 mln aýyl turǵyndarynyń ómir súrý sapasyn jaqsartýǵa múmkindik beredi. Jalpy aýyldyq jerlerdi damytýdyń keshendi tásili 2025 jylǵa qaraı aýyl turǵyndarynyń ómir súrý sapasyn jáne ál-aýqatyn aıtarlyqtaı arttyrýǵa múmkindik ashady. Máselen, aýyl halqynyń sýmen qamtý qyzmeti 100 paıyz jetetin bolady», - dedi mınıstr.

Onyń atap ótýinshe, barlyq aýyl turǵyndary joǵary jyldamdyqty ınternetke qol jetkizedi. Jergilikti mańyzǵa ıe joldardyń 95 paıyz jaqsy jaǵdaıǵa keltiriledi. 10 myń shaqyrym aýyl ishindegi joldar jóndeledi jáne salynady. Aýyldyq jerlerde 24 mln sharshy metr turǵyn úı paıdalanýǵa beriledi. 110 myń jer ýchaskeleri jeke turǵyn qurylysy úshin qajetti ınfraqurylymmen qamtylady.

«Jalpy 12 myń shaqyrym ınjenerlik jeliler salynady jáne jańǵyrtylatyn bolady. Agroónerkásip kesheninde 845 ınvestıtsııalyq jobany iske asyrý aýyldarda 500 myń jańa jumys ornyn qurýǵa múmkindik beredi», - dedi Áset Erǵalıev.