Aýyldyq jerlerdegi 4483 sport zalynyń tek 20 paıyzy ǵana jalpy jurtqa qoljetimdi - T.Esentaev
ASTANA. QazAqparat - Jergilikti ákimdikter buqaralyq sportty damytýǵa jete kóńil bólip otyrǵan joq. Bul týraly búgin QR Sport jáne dene shynyqtyrý isteri agenttiniń alqa májilisinde vedomstvo basshysy Tastanbek Esentaev málim etti.
«Aýyldyq jerlerde 4483 sport zalynyń 3650-i jalpy bilim beretin mektepterdiń qaramaǵynda ári sabaq júrgizýge paıdalanylady. Sport zaldarynyń tek 20 paıyzy ǵana sportpen aınalysýǵa qoljetimdi»,- dedi agenttik basshysy.
T.Esentaevtyń sózine qaraǵanda, búgingi tańda respýblıkada sport ǵımarattarymen qatar uıymdarda, bilim berý mekemelerinde sporttyq qural-jabdyqtardyń da jetispeýshiligi anyq baıqalady.
«Ákimdikter qabyldaǵan sharalar jetkiliksiz. Oblystyq mańyzy bar árbir aýdan men qalada dene shynyqtyrý-saýyqtyrý keshenderin salý boıynsha sharalar qabyldaý qajet», - dedi ol.
Onyń atap ótýinshe, aǵymdaǵy jyly memlekettik bıýdjet qarajaty esebinen 15 dene shynyqtyrý-saýyqtyrý keshenin salý kózdelýde. Qolǵa alynatyn bul sharalar 2020 jylǵa qaraı halyqtyń 30 paıyzynyń sportpen aınalysýyna múmkindik beredi.
