Aýyldyq jerlerde memqyzmetkerler nege tapshy
ASTANA. QazAqparat - 2016 jyly aýyldyq jerlerde memlekettik qyzmetke baratyndar az boldy.
Bul týraly Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov málim etti, dep habarlaıdy QazAqparat.
«Aýyldyq jerlerde kadrlar tapshylyǵy bizdi alańdatyp otyr. Ótken jyly 5 myńnan astam bos orynǵa tek 3500 adam úmitti boldy, ıaǵnı bir bos orynǵa qyzmetke turýǵa nıettiler sany az ekeni baıqalýda. Sonymen birge uzaq ýaqyt boıy elimiz boıynsha barlyq bos orynnyń 25 paıyzynyń orny toltyrylmady. Bul rette, negizgi sebep aýyldyq jerde memlekettik qyzmettiń tartymdylyǵy tómen deńgeıde bolýyna baılanysty bolyp tur. Osy problemalar barlyqtaryńyzǵa málim dep oılaımyn. Tıisti jaǵdaıdy jasaý úshin áleýmettik ári quqyqtyq sıpattaǵy sharalardy naqty qabyldaýdyń ýaqyty jetkenin túsinip otyrmyz»,-dedi Qojamjarov «Nur Otan» partııasynda ótken memlekettik qyzmetti reformalaý máseleleri jónindegi partııalyq tyńdaýlar barysynda.
Osy oraıda agenttik basshysy eldi mekenderde azamattyq qyzmetkerler úshin belgili bir jeńildikter bar ekenin, dárigerler men veterınarlar jáne ózge de mamandyqtarǵa arnaıy baǵdarlamalar qarastyrylǵanyn eske salyp ótti. Alaıda memlekettik qyzmetkerler osy tizimge enbegen. Joǵary oqý ornyna túsý kezinde aýyldyq jastardyń bilimine 30 paıyzdyq kvota bolǵanymen, osy mamandardyń kóbisi aýyldaryna oralmaı, qalada qalyp jatady.
Munymen qosa, ol memqyzmetkerlerdi oqytý sapasy boıynsha keıbir kemshilikter bar ekenin, óńirlerdegi oqytý ortalyqtary búgingi talaptarǵa saı kelmeıtinin atap ótti. Sondyqtan da oqytý sapasyn arttyrý úshin Prezıdent Ákimshiligine tıisti usynystar engizilgen kórinedi.
