Aýyldyq jerlerde Internetke qyzyǵýshylyqty arttyrý kerek - S. Áıimbetov
ASTANA. 28 mamyr. QazAqparat - aýyldyq jerlerde Internetke qyzyǵýshylyqty arttyrý kerek. Búgin Parlament Májilisinde aqparattyq kommýnıkatsııa tehnologııalary salasyn damytý qorytyndylary taqyrybynda ótken Úkimet saǵatynda Ekonomıkalyq reforma jáne óńirlik damý komıtetiniń tóraǵasy depýtat Seıitsultan Áıimbetov osyndaı pikir bildirdi.
Óz sózinde depýtat S. Áıimbetov mınıstrliktiń derekterine súıene otyryp, 2011 jyly Internetti paıdalanýshylardyń sany 100 turǵynǵa shaqqanda 53-ten kelgenin, bul 8,7 mln. adamdy quraǵanyn aıtty. «Alaıda, osy kórsetkishtiń nebary 30 paıyzyn ǵana aýyldyq jerlerdegi Internetti paıdalanýshylar quraıdy.Osyǵan baılanysty aýyldy sapaly baılanyspen qamtamasyz etý problemasy áli de kún tártibinen túsken joq. Depýtattar tarapynan bul másele árdaıym aıtylyp keledi. Aýyldyq jerdegi turǵyndardyń tabysy qalada turatyndardyń tabysynan edáýir az ekenin eskere otyryp, aýyldyq Internetke qyzyǵýshylyqty arttyrý kerek dep oılaımyz», - dedi S. Áıámbetov.
Onyń paıymdaýynsha, eger jergilikti jerlerde Internetti qosý men paıdalanýdy «jaǵdaı kóteretin» bolsa, onda aýyldyń árbir turǵyny «ozyq» kompıýterdi satyp alýǵa múmkinshilik alar edi. Bul - 7 mln. 520 myń 700 aýyl turǵyndaryn bildiredi.
«Sondyqtan aýyldyq jerlerde Internettiń tarıfterin qaıta balanstaý, Internetke kirý pýnktterin, symsyz baılanysty, flesh-kartalardy engizý arqyly selolardy aqparattyq-kommýnıkatsııalyq jaǵynan qamtamasyz etý jónindegi qatynastardy kúsheıtý kerek»,- dedi S. Áıimbetov.
