Aýyldyq jerlerde azamattyq bastamalardy qoldaý tetigi ázirlenýde

NUR-SULTAN. QazAqparat – Aýyldyq jerlerde azamattyq bastamalardy qoldaý tetigi ázirlenýde. Bul týraly Úkimet otyrysynda QR Aqparat jáne qoǵamdyq damý vıtse-mınıstri Serik Egizbaev aıtty, dep habarlaıdy QazAqparat tilshisi.

«Granttyq qarjylandyrý júıesin jeńildetý arqyly aýyldyq jerlerde azamattyq bastamalardy qoldaý tetigi ázirlenýde. Ol úshin osy aıda Májiliske engiziletin «Volonterlik týraly» zań jobasy aıasynda tıisti túzetýler kózdeletin bolady. Bul - aýyldyq úkimettik emes uıymdardy qamtı otyryp, granttyq qarjylandyrý protsesterin avtomattandyrý. Osy baǵytta operator ártúrli derekter bazasynan – úkimettik emes uıymdar derek qory, Memlekettik kirister komıteti derek qory jáne basqa da derek qorlardyń bazasymenn ıntegratsııalaný arqyly qajetti qujattardy derbes jınaıtyn bolady», - dedi ol.

Vıtse-mınıstrdiń atap ótýinshe, úkimettik emes uıymdar konkýrsqa qatysý úshin usynatyn qujattar tizbesi 2 esege qysqartylady. Olardyń operator aldyndaǵy eseptiligi jeńildetiledi. Aýyldyq úkimettik emes uıymdardy jergilikti bıýdjetten qarjylandyrýdy ulǵaıtý tetikteri de kózdeledi.

«Búginde zań jobasy jarııa talqylaýdan ótip, memlekettik organdarmen jáne Prezıdent Ákimshiligimen kelisilip, Premer-Mınıstr Keńesinde qaralyp jatyr», - dedi Serik Egizbaev.

Eske salsaq, 1 qyrkúıek kúni QR Prezıdenti Qasym-Jomart Toqaev «Halyq birligi jáne júıeli reformalar – el órkendeýiniń berik negizi» atty halyqqa Joldaýyn jarııalady. Joldaýdyń tolyq mátini myna jerde.