Aýyldyq medıtsına uıymdaryna 24 jyljymaly medıtsınalyq keshender tabys etildi
NUR-SULTAN. QazAqparat - Búgin Qazaqstan Respýblıkasy Premer-Mınıstriniń orynbasary Eraly Toǵjanov basshylyǵymen otandyq óndiristiń 24 jyljymaly medıtsınalyq keshenin elimizdiń tórt soltústik óńirindegi aýdandyq aýrýhanalardyń qyzmetkerlerine saltanatty tabystaý rásimi ótti, dep habarlaıdy QazAqparat tilshisi primeminister.kz silteme jasap.
Vıtse-premer E. Toǵjanov quttyqtaý sózinde Memleket basshysy men Úkimettiń atynan elimizdiń barlyq medıtsına qyzmetkerlerine qajyrly eńbekteri úshin shyn júrekten alǵysyn bildirdi. El basshylyǵy sapaly medıtsınalyq kómek kórsetý úshin aýrýhanalardy zamanaýı medıtsınalyq jabdyqtarmen jabdyqtaý boıynsha sharalar qabyldanǵanyn erekshe atap ótti. Jyljymaly medıtsınalyq keshender otandyq avtokólik negizinde qurystyrylǵan jáne kóshpeli jaǵdaıda azamattardyń densaýlyǵyn tekserýdiń keń spektrine arnalǵan. Keshen tsıfrlyq quraldarmen jabdyqtalǵan 7 mamandandyrylǵan kabınetten turady: jalpy qabyldaý kabıneti, jalpy tájirıbelik dáriger zonasy, taldaýlardy qabyldaý zonasy, dárihana pýnkti, fýnktsıonaldyq dıagnostıka testileri, akýsher-gınekolog kabıneti, sáýlelik dıagnostıka kabıneti. Sonymen qatar, mobıldi medıtsınalyq ortalyqta arnaıy qorǵasynmen qaptalǵan bólme ornatylǵan, onda rentgen jáne flıýorografııany qaýipsiz jasaýǵa bolady. Júıeniń basqa adamnyń járdemine muqtaj jandar úshin ınfraqurylymdyq júıemen jabdyqtalýy óte mańyzdy — pandýs-lıft múmkindigi shekteýli adamdardy qabyldaýdy qoljetimdi etedi. Atalǵan keshender aýdan ortalyqtarynan 100 shaqyrymnan astam qashyqtyqta ornalasqan aýyldyq okrýgterde medıtsınalyq qyzmetterdi joǵary deńgeıde kórsetýge múmkindik beredi. Aǵymdaǵy jyldyń 23 qazanyna deıin Qazaqstannyń óńirleri 100 jyljymaly medıtsınalyq keshenmen qamtamasyz etiledi. Óz kezeginde medıtsına qyzmetkerleri memleket tarapynan jan-jaqty qoldaý kórsetilip kele jatqanyna zor rızashylyqtaryn bildirdi. Osyndaı keshenderdiń arqasynda dárigerler aýyl turǵyndaryna sapaly kómek kórsetip, Qazaqstan azamattarynyń densaýlyǵy men ómir súrý uzaqtyǵyn jaqsarta alatynyn atap ótti.
