Aýyldyq densaýlyq saqtaýdy jańǵyrtý: SQO-da ulttyq joba aıasynda 46 nysan salynady
SQO densaýlyq saqtaý basqarmasynyń basshysy Qumar Kúsemisovtiń aıtýynsha, medıtsınalyq-sanıtarııalyq alǵashqy kómektiń qoljetimdiligin arttyrý maqsatynda óńirde 46 nysan salynbaq. Olar halyq kóp qonystanǵan eldi mekenderde boı kóteredi. Sonyń 9-ynyń qurylysy osy jyly bastalmaq.
«Aýyldyq densaýlyq saqtaýdy jańǵyrtý» ulttyq jobasy aıasynda Taıynsha kópbeıindi aýdanaralyq aýrýhanasy da jańartylady. Emdeý mekemesine 919,3 mln teńgege medıtsınalyq qondyryǵylar alynyp, 477 mln teńgege kúrdeli jóndeý júrgizilmek.
«Byltyr «Aýyl – el besigi» baǵdarlamasy aıasynda 4 joba qolǵa alynyp, Andreevka eldi mekeninde dárigerlik ambýlatorııa, Ǵ. Músirepov atyndaǵy aýdandyq aýrýhanada bosaný jáne terapııa bólimderi, emdeý mekemesiniń baspaldaq alańdary kúrdeli jóndeldi. Al, jergilikti bıýdjet esebinen 146 mln teńgege 2 joba júzege asty. Bul qarajatqa oblystyq kópbeıindi balalar aýrýhanasynyń kireberisine jáne oblystyq ftızıopýlmonologııa ortalyǵy emdeý ǵımaratynyń shatyry aýystyryldy», - deıdi Qumar Kúsemisov.
Bıyl da birqatar iri joba qolǵa alynbaq. Máselen, oblystyń keshendi jospary boıynsha Kishkenekól aýylynda 250 adamǵa shaqtalǵan emhana qurylysy bastalady.
Petropavldaǵy «Bereke» men «Jas Órken» shaǵyn aýdandarynda bir mezette 250 adam bara alatyn emhanalardyń qurylysy jalǵasady.
Jalpy, byltyr SQO-da tek medıtsınalyq qondyrǵylardy satyp alýǵa ǵana 3,4 mlrd teńge jumsaldy. Bul qarajatqa MRT, KT, beıneendoskopııa kesheni, rentgen appparattary sııaqty 255 qondyrǵy satyp alyndy.
Budan basqa salanyń tehnıkalyq parki 267,7 mln teńgege 15 JAC jáne ÝAZ sanıtarlyq avtokólikterimen tolyqty.
