Aýyldyq densaýlyq saqtaýdy jańǵyrtý: BQO-da 12 medıtsına nysanynyń qurylysy bastaldy

ASTANA. QazAqparat – QR Densaýlyq saqtaý mınıstrligi «Aýyldyq densaýlyq saqtaýdy jańǵyrtý» ulttyq jobasy sheńberinde iske asyrylyp jatqan Batys Qazaqstan oblysyndaǵy medıtsınalyq obektilerdiń qurylys jumystarynyń barysyn málim etti, dep habarlaıdy QazAqparat.

QR Densaýlyq saqtaý mınıstrligi baspasóz qyzmetiniń habarlaýynsha, ulttyq joba aldaǵy eki jylda 655 medıtsınalyq obekti salýdy kózdeıdi.

Máselen, 2023 jylǵa 99 medıtsınalyq obekti salýǵa qarajat bólindi.

Jańa obektilerdi salý nátıjesinde shamamen 1 mln aýyl turǵyny medıtsınalyq-sanıtarııalyq alǵashqy kómekpen qosymsha qamtylady, MSAK qoljetimdiligin arttyrý (profılaktıkalyq tekserýler, skrınıng, erte anyqtaý), ýaqtyly medıtsınalyq kómek kórsetý, asqynýlardyń profılaktıkasy qamtamasyz etiledi.

Bıyl BQO-da qurylys-montaj jumystary bastalǵan 12 medıtsınalyq nysannyń qurylysy josparlanǵan. Bular Bórli aýdanynyń Araltal, Báıterek aýdanynyń Asan, Kaztalov aýdanynyń Bostandyq, Terekti aýdanynyń Saryómir aýyldaryndaǵy dárigerlik ambýlatorııalar, sondaı-aq Terekti aýdanynyń Barbastaý, Jánibek aýdanynyń Jaqsybaı, Kaztalov aýdanynyń Qaraózen, Jańaqala aýdanynyń Qyzyloba, Bókeı ordasy aýdanynyń Muratsaı, Syrym aýdanynyń Óleńti, Jánibek aýdanynyń Qamysty, Báıterek aýdanynyń Novenkıı aýyldaryndaǵy feldsherlik-akýsherlik pýnktter.