Aýyldyq aımaqtaǵy ózin-ózi jumyspen qamtýshylar sany eldegi jumys istep júrgen adamdardyń 70 paıyzdan astamyn quraıdy - dóńgelek ústel otyrysy
ASTANA. Qańtardyń 19-y. QazAqparat /Aıdar Ospanalıev/ - Eldegi ózin-ózi jumyspen qamtyǵan azamattardyń qurylymy jónindegi statıstıkalyq málimetter, atalmysh sanattaǵylardyń sany jyl saıyn tómendep otyrǵandyǵyn kórsetedi.
Esesine, jaldamaly jumysshylardyń sany ósip otyr. Ótken jyldyń 3-shi toqsanyndaǵy resmı kórsetkishter boıynsha ózin-ózi jumyspen qamtýshylar sany elde 2,7 mıllıon adamdy quraıdy. Nemese, olar eldegi jumyspen qamtylǵan azamattardyń jalpy sanynyń 33,8 paıyzy. Bul máseleni búgin Astanada «Almaty qalasy men Almaty oblysynyń Eńbekshiqazaq aýdanynyń úlgisindegi halyqtyń ózin-ózi jumyspen qamtý jaǵdaıy týraly» atty taqyrypta ótken dóńgelek ústel otyrysynda Birjan Nurymbetov málim etti, dep habarlaıdy QazAqparat.
Onyń aıtýynsha, ózin-ózi jumyspen qamtyǵandardyń ishinde áıelder sany 1,4 mıllıondy quraıdy eken. Ózin-ózi jumyspen qamtýshylardyń basym bóligin, ıaǵnı 89 paıyzyn nemese 2,4 mıllıondy óz erkimen tirlik jasaı alatyn azamattar qurap otyr. Bul sanattaǵy azamattardyń basym bóligi nemese 1,3 mıllıon adam ózderi turyp jatqan turǵyn úılerdiń aımaǵyndaǵy jumystarmen aınalysady jáne olardyń turaqty emes kiristeri bar. Sondaı-aq aýyl sharýashylyǵy, saýda, avtomobıl buıymdaryn jóndeý, kólik jáne qurylys salasyndaǵy jumystarmen aınalysyp júrgender de bar. «Ózin-ózi jumyspen qamtyǵan azamattardyń turǵylyqty jerine baılanysty júrgizilgen zertteýler olardyń negizinen elimizdiń ońtústik óńirleri men respýblıkanyń aýyldyq aımaqtarynda ornalasqandyǵyn kórsetip otyr. Qazirgi tańda aýyldyq aımaqtaǵy ózin-ózi jumyspen qamtýshylar sany 1,9 mıllıon adamdy qurady. Bul jumyspen qamtylǵandardyń 70 paıyzynan astamy», dedi vıtse-mınıstr.
