Aýyldyq aýmaqtardy damytýǵa arnalǵan is-sharalar tolyq aıaqtalsa ıgi - B. Jylqyshıev
ASTANA. 4 qarasha. QazAqparat /Qanat Mámetqazyuly/ - Aýyldyq aýmaqtardy damytýǵa arnalǵan is-sharalar tolyq aıaqtalsa ıgi. Búgin QR Parlamenti Senatynyń jalpy otyrysynda Úkimet basshysynyń atyna depýtattyq saýal joldaǵan senator Bolat Jylqyshıev osylaı málim etti.
«Aýyldyq aýmaqtardy damytýdyń 2004-2010 jyldarǵa arnalǵan memlekettik baǵdarlamasynyń oryndalýyna kóp qarjy bólindi. Qolda bar málimetterge qaraǵanda, aýyldardy damytý sharalaryna 760 mıllıard teńge jumsaldy. Kóptegen mektepter, aýrýhana, telefon jelileri, mádenıet oryndary jóndeldi, iske qosyldy. Baǵdarlamanyń elimizge, ekonomıkamyzǵa máni óte zor bolǵany aıqyn. Alaıda, aýylda sheshimin tappaǵan kúrdeli máseleler áli de az emes», dedi senator B. Jylqyshıev. Onyń aıtýynsha, aýyldyq aýmaqtardaǵy problemalardy sheshýge bir jaǵynan qarjynyń azdyǵy qolbaılaý bolsa, ekinshi jaǵynan eldi mekenderdiń shalǵaılyǵy da áser etýde.
«Bastalǵan baǵdarlama toqyrap qalmaýy úshin alynǵan baǵytta ári qaraı jumys jalǵasýy qajet. Osyǵan baılanysty bir usynys týyndap otyr. Aýyldy damytý máselelerin Qazaqstan Respýblıkasynyń 2020 jylǵa deıingi Aýmaqtyq-keńistiktik damýdyń boljamdy syzbanusqasyna jeke bólim retinde engizip, bastalǵan is-sharalardyń durys deńgeıde, tolyq aıaqtalýyn qamtamasyz etý qajet dep sanaımyz», dedi senator.
