Aýyldy damytýdy Ulttyq ekonomıkadan Aýyl sharýashylyǵy mınıstrligine berý kerek - senator

«Aýyldyq aımaqtardy damytý jumystaryn tıimdi júrgizý úshin tıisti usynystardy eńgizemiz. Birinshiden, Úkimet aýyldyq aımaqtardy damytý baǵdarlamasynyń tujyrymdamasyn túbegeıli qaıta qarastyrýy qajet. Osy oraıda eń aldymen, aýyldyq aımaqtardy damytý baǵytyn jeke qujatpen ulttyq joba retinde qabyldaý jón bolar edi. Ekinshiden, aýyldyq aımaqtardy damytý máselelerin basqarýdy Ulttyq ekonomıka mınıstrligi qaramaǵynan alyp Aýyl sharýashylyǵy mınıstrligine berý kerek. Sebebi aýyl óndirisi men aýyldyq turǵyndarǵa ońtaıly jaǵdaı jasaý ortaq máseleniń quramdas bóligi jáne ony bólip-aıyrýdyń qajeti joq. Sonymen qatar, bul – búkil álemdik tájirıbe. Eýropanyń kóptegen memleketterinde, Kanada, Aýstralııa, Reseı jáne Belarýs sekildi agrarlyq elderde aýyldyq jerlerdi damytý máselesimen Aýyl sharýashylyǵy mınıstrligi aınalysady», - dedi A. Kúrishbaev Senattaǵy aýyldyq aýmaqtardy damytý jónindegi parlamenttik tyńdaýda.

Onyń paıymynsha, ulttyq jobany qarjylyq qamtamasyz etý qaǵıdattaryn túbegeıli qaıta qarastyrǵan jón. Bul jerde aýyldyq jerlerdiń ınfraqurylymyn damytý protsesine qatysqan memlekettik emes qurylymdardyń shyǵyndaryn sýbsıdııalaý arqyly osy iske jeke kapıtaldy barynsha tartýdyń mańyzy asa zor.

«Aýylsharýashylyq óndiristi, aýyldyq aımaqtardy damytý úshin aýyl bıznesin qoljetimdi uzaq merzimdi nesıemen qamtamasyz etý óte mańyzdy. «Báıterek» jáne «QazAGRO» holdıngteri birikkennen keıin, olardyń basty qyzmet etý nysany aýyl men aýyl sharýashylyǵy bolady degen úmittemiz. Ol úshin jańa qarjy júıesiniń negizgi quryltaıshysy Aýyl sharýashylyǵy mınıstrligi bolý kerek dep sanaımyz. Qosalqy sharýashylyqtardyń kooperatsııasyn, aýyldaǵy mal basyn jaıylym jáne jem-shóppen qamtamasyz etý máselesin túbegeıli túrde sheshý qajet. Bıylǵy joldaýynda Prezıdent osy suraqtarǵa qatysty jáne 1 mln aýyl turǵyndarynyń tabysyn turaqty túrde kóterý týraly naqty tapsyrma bergen bolatyn», - dedi senator.