Aýyldasynyń jylqysyn uryp óltirgen malshy isti boldy
KÓKShETAÝ. QazAqparat - Aqmola oblysynda aýyldasynyń jylqysyn uryp óltirgen 37 jastaǵy malshynyń ústinen qylmystyq is qozǵaldy, dep habarlaıdy «QazAqparat» HAA tilshisi.
Polıtseılerdiń málimeti boıynsha, aǵymdaǵy jyldyń 28 mamyrynda Bulandy aýdany Makınsk qalasynyń 49 jastaǵy turǵyny polıtsııaǵa aryzdanǵan. Aryzdanýshynyń sózine qaraǵanda onyń jylqysy malshynyń qatygez áreketi saldarynan aram ólgen.
«Tergeý amaldary barysynda anyqtalǵandaı kúdikti ózi baǵatyn jylqyny uryp úıretpek bolǵan. Aldymen asaýdy rezeńke shlangpen soqqynyń astyna alǵan. Keıin ábden álsiregen jylqyny erttep minip, 3 shaqyrymnan astam qashyqtyqqa toqtaýsyz shapqan. Odan soń boıynda kúsh qýaty taýsylǵan jylqyny bossatyp jibere salǵan. Alaıda, álsiz jylqy kóp uzamaı aram ólgen. Zardap shegýshi malshyǵa jylqysyn úıretýge ruqsat bermegen», dep túsindirdi polıtseıler.
Qazirgi kezde, qatygez malshynyń ústinen QR QK 316-babynyń 1-bólimi boıynsha qylmystyq is qozǵalyp otyr. Eger kúdiktiniń kinási dáleldense, onda ol mal ıesine keltirgen 350 000 teńge kólemindegi shyǵyndy ótep berýge mindetteledi.
