Aýyldasyn baltamen urǵan: Saryaǵashta 5 jasar qyzdy óltirgen kúdikti eki aı buryn nege túrmege otyrmady
Jibek joly aýylynda kishkentaı qyzdy zorlady jáne óltirdi dep kúdikke ilingen er adam 2006 jyly kisi óltirgeni úshin 10 jylǵa bas bostandyǵynan aıyrylǵan.
2016 jyly ol jazasyn ótep bolǵan soń bosatylǵan.
Atalǵan sottylyq Quqyqtyq statıstıka jáne arnaıy esepke alý komıtetiniń anyqtamasyna sáıkes 2022 jyly ótelgen.
Bıylǵy mamyr aıynda densaýlyqqa aýyr zııan keltirgeni úshin sottalǵan.
Sottalýshy jábirlenýshimen birge alkogol iship, aýyzsha janjaldan keıin ony turmystyq baltamen urǵan.
«Sot osy qylmystyq isti qaraý barysynda kináni jeńildetetin mán-jaıdy eskerdi. Ol - sottalýshynyń kinásin tolyq moıyndaýy jáne jasaǵan isine ókinýi, kelgen zııannyń ornyn toltyrýy. Sondaı-aq jábirlenýshiniń ózi ony keshirip, jeńil jaza taǵaıyndaýdy surady. Úkim shyqqan kezde sottalýshynyń sottylyǵy bolǵan joq, óıtkeni ol zań boıynsha ótelgen. Kináni aýyrlatatyn jaǵdaılar anyqtalǵan joq. Osyny eskere otyryp, sot QK 106-babynyń 1-bóligi boıynsha sottalýshyny kináli dep taýyp, 3 jylǵa bas bostandyǵyn shektedi. Jaza jábirlenýshiniń pikirin eskere otyryp, atalǵan baptyń sanktsııasy sheginde taǵaıyndalady» delingen Túrkistan oblystyq sotynyń baspasóz qyzmeti taratqan aqparatta.
Úkimge apellıatsııalyq shaǵym túspegen nemese narazylyq bildirilmegen.
Úkim zańdy kúshine engennen keıin sottalǵan er adam qylmystyq-atqarý júıesi organdarynyń probatsııalyq baqylaýyna berilgen.
Aıta keteıik, Memleket basshysy Túrkistan oblysyndaǵy qaıǵyly oqıǵanyń mán-jaıyn muqııat tekserýdi tapsyrǵan bolatyn.
Al, búgin kisi qolynan kóz jumǵan 5 jasar búldirshinniń denesi jer qoınyna tapsyryldy.
