Aýyldasy zorlaǵandyǵy týraly jalǵan sóılegen aqmolalyq áıel 3 jylǵa sottaldy
Vedomstvonyń málimetinshe, ótken jyldyń jazynda Sandyqtaý aýdanyndaǵy aýyldardyń biriniń turǵyny aýdandyq polıtsııa bóliminiń kezekshi bólimine qońyraý shalyp, aýyl turǵyny onyń erkine qarsy jynystyq qatynasqa túskenin habarlaǵan. Osy oqıǵaǵa baılanysty Qylmystyq kodekstiń 120-baby boıynsha sotqa deıingi tergeý júrgizildi.
Polıtsııa qyzmetkerleri kúdiktini ustady. Qylmystyq kodekstiń 419-shy babynda kózdelgen jalǵan aıǵaqtar bergeni úshin qylmystyq jaýaptylyq týraly eskertilgen jábirlenýshi bultartpaý sharasyn tańdaý kezinde kúdiktige kúzetpen ustaý túrinde óziniń aıǵaqtaryn talap etip, sotqa ony zorlaǵanyn habarlady. Tergeý áreketterin júrgizý kezinde áıel óz aıǵaqtaryn aıtyp sendirdi. 2020 jyldyń tamyzynda qylmystyq is materıaldary sotqa jiberildi.
«Sot tergeýi barysynda 32 jastaǵy áıel polıtsııaǵa bergen aıǵaqtarynan bas tartyp, oqıǵanyń ózara kelisim boıynsha bolǵanyn moıyndady. Birge turatyn adamnyń kózine shóp salǵandyǵyn aıtyp qoıǵan aýyldasyna ashýlanǵan áıel, odan ári qarym-qatynasy týraly ýaıymdap, polıtsııaǵa qońyraý shalyp, «zorlaý» týraly habarlady. Aýyl turǵynynyń qoǵamǵa qaýipti is-áreketteriniń nátıjesinde 7 aıdan astam qamaýda otyrǵan Sandyqtaý aýdany turǵynynyń konstıtýtsııalyq quqyqtary buzyldy, sondaı-aq quqyq qorǵaý organdary men sottyń kúshi men qarajaty negizsiz jumsaldy», - dedi vedomstvodan.
Vedomstvonyń baspasóz qyzmetinen atap ótkendeı, Sandyqtaý aýdandyq sotynyń úkimimen bıylǵy jylǵy aqpanda er adam Qylmystyq kodekstiń 120-shi babynda kózdelgen qylmysty jasaǵany úshin kinásiz dep tanylyp, sot zalynan bosatyldy.
«Al quqyq qorǵaý organdaryn jańylystyrǵan áıelge qatysty Qylmystyq kodekstiń 419-shy baby «Kórineý jalǵan sóz jetkizý» boıynsha sotqa deıingi tergeý bastaldy. 2021 jylǵy tamyzda qylmystyq is materıaldary sotqa jiberildi. Osylaısha, kórineý jalǵan aryz bergen áıeldi Zerendi aýdandyq sotyn Qylmystyq kodekstiń 419-shy babynyń 3-bóligi boıynsha 3 jylǵa bas bostandyǵynan aıyrdy. Qazannyń 7-de sot úkimi zańdy kúshine endi», - dep tolyqtyrdy vedomstvodan.
Qazirgi ýaqytta áıel bas bostandyǵynan aıyrý oryndarynda jazasyn ótep jatyr.
Osy rette, Aqmolalyq polıtsııa qyzmetkerleri Qylmystyq kodekstiń 419-shy baby «Kórineý jalǵan sóz jetkizý» boıynsha qylmystyq jaýapqa tartylatynyn eske salady. Máselen, qylmys jasaǵany týraly kórineý jalǵan sóz jetkizý 5 jylǵa deıingi merzimge bas bostandyǵyn shekteýge nemese sol merzimge bas bostandyǵynan aıyrý jazasyn qarastyrady.