Aýyldarǵa sapaly aýyz sý tartý úshin 8 mlrd teńge bólindi - Qostanaı oblysy
Qostanaı oblysy ákiminiń orynbasary Erlan Spanovtyń aıtýynsha, aýyl turǵyndaryn sapaly aýyz sýmen qamtamasyz etý jáne sý burý júıelerin jaqsartý boıynsha keshendi jumystar júrgizilýde. Mysaly, ótken jyly eldi mekenderdi sýmen jabdyqtaý jáne sý burý nysandaryn qaıta jańartýǵa 9,3 mlrd teńge jumsaldy. Osy jumystyń nátıjesinde 60 myńǵa jýyq adam turatyn 12 aýylda sýmen jabdyqtaý jelileri jańartyldy.
«Osy jyly Qarasý aýdanynyń Arqa, Naýyrzym aýdanynyń Sholaqsaı jáne Amangeldi aýdanynyń Aǵashtykól aýyldary ortalyqtandyrylǵan aýyz sý júıesine qosylady. Bul maqsattarǵa aǵymdaǵy jyly bıýdjetten 8,2 mlrd teńge qarastyrylyp otyr. Barlyǵy 25 joba júzege asady. Jyl sońyna deıin 11 aýylda sýmen jabdyqtaý nysandary paıdalanýǵa beriledi», - dedi E. Spanov.
2019 jyly Altynsarın aýdanynyń Dokýchaevka, Shoqaı aýyldary, Jitiqara aýdanynyń Zabelovka, Sarykól aýdanynyń Zlatoýst, Taran aýdanynyń Novoılınov, Arqalyq qalasynyń Vostochnoe aýylyna ortalyqtandyrylǵan aýyz sý beriledi.
2011-2016 jyldar aralyǵynda iske asyrylǵan «Aq bulaq» baǵdarlamasy aıasynda oblysta 75 joba iske asyryldy. Buǵan bıýdjetten 34 mlrd teńge bólindi. Nátıjesinde 1,1 myń shaqyrym sý jelisi qoldanysqa berildi.
