Aýyldardy ınternetpen qamtýǵa arnalǵan saıt iske qosylady

ASTANA. QazAqparat – Endi elimizde ár eldi mekendi ınternetpen qamtý boıynsha aqparat ázirlenip, ol arnaıy saıtqa júkteledi. Sol arqyly aýyldardy ınternetpen qamtý jaǵdaıymen tanysý múmkindigi týady. Tolyǵyraq Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtyp berdi, dep habarlaıdy QazAqparat tilshisi.

«Qoljetimdi ınternet» ulttyq jobasynyń maqsaty – halyq pen bıznesti optıka arqyly joǵary jyldamdyqty ınternetpen qamtamasyz etý. Jobada negizgi kórsetkishter de usynylǵan. Ol kórsetkishterge qol jetkizý úshin oblys ákimdikterimen ár eldi meken boıynsha naqty jospar jasaqtalyp jatyr. Búginde ShQO, Aqtóbe oblysy boıynsha jol kartalary ázirlendi. Osylaısha, ár eldi mekendi ınternetke qosý boıynsha aqparat daıyndalyp, ol arnaıy saıtqa júkteledi. Arnaıy saıt bıyl maýsymda iske qosylady», -dedi Baǵdat Mýsın Úkimet otyrysynda.

Sondaı-aq, mınıstr baılanys sapasyn jaqsartý maqsatynda basty normalar ázirlengenin aıtty.

«Baılanys operatorlaryna optıkalyq jeliler jáne uıaly baılanys jabdyqtaryn ornalastyrý úshin jyljymaıtyn múlik obektilerine (kóppáterli turǵyn úıler, ákimshilik ǵımarattar, bıznes-ortalyqtary, ónerkásipter, taǵy sol sııaqty) teń qoljetimdilik usynylmaq. Onyń nátıjesinde kóppáterli turǵyn úılerde birneshe baılanys operatoryna qosylý múmkindigi bolady. Respýblıkalyq jáne jergilikti avtojoldardy josparlaý jáne jóndeý kezinde optıkalyq jeliler salý qarastyrylady. Ol avtojol boıyn sapaly baılanyspen qamtýǵa múmkindik beredi», - deıdi vedomstvo basshysy.