Aýyldardy damytýǵa bólingen qarajat somasy belgili boldy

ASTANA. QazAqparat – Búgin Senattyń jalpy otyrysynda QR Premer-Mınıstriniń birinshi orynbasary Roman Sklıar «Aýyl – El besigi» jobasyn iske asyrý barysy jaıynda aıtty, dep habarlaıdy QazAqparat tilshisi.

«Elimizde 6293 aýyl bar jáne bul eldi mekenderde 8 mln-ǵa jýyq adam turady. Bul óz kezeginde halqymyzdyń 41 paıyzyna teń. 2019 jyldan bastap «Aýyl – El besigi» jobasy júzege asyrylyp jatyr. Onyń maqsaty – áleýeti bar 3,5 myń aýylda ınfraqurylymdy damytý. 2019-2021 jyldary bul jobaǵa 200 mlrd teńge bólindi. Osy qarajat esebinen 665 aýylda tıisti ınfraqurylym jasaldy», - dedi R. Sklıar.

Onyń aıtýynsha, aýyldyń jaǵdaıyn jaqsartýǵa jeke ınvestorlar da úles qosyp jatyr. 2019 jyldan bastap olar 57 mlrd teńge qarajat salyp, 2 myńǵa jýyq jobany iske asyrdy. Bıyl «Aýyl – El besigi» jobasyna 128 mlrd teńge bólindi. Bul qarajat 576 aýylǵa baǵyttalyp otyr. 2023 jyly 140 mlrd teńge bólinip, 663 aýyl qamtylmaq.

«Aýyl halqynyń eń basty problemasy - jumyspen qamtý. Bul baǵytta ne istep jatyrmyz? «Bastaý-Bıznes» jobasy boıynsha 66 myń adamdy kásipkerlikke úırettik, óz kásibin ashý úshin 10 myń aýyl turǵyny 50 mlrd mıkrokredıt aldy, ıaǵnı 6 paıyzben 7 jylǵa deıin. Jaqynda Jambyl oblysynda bir pılottyq jobany iske asyrdyq. Ol boıynsha áleýmettik kásipkerlik palata arqyly aýyl turǵyndarynyń kásibine 2,5 paıyzdyq nesıe berildi. Pılottyń joba jaqsy nátıje berdi. Sondyqtan kelesi jyly ony barlyq óńirge taratamyz. Oǵan 52 mıllıard teńgeden astam bólinedi. Sonyń esebinen 11 myń jumys orny ashylady dep josparlap otyrmyz», - dedi R. Sklıar.