Aýyldardy aýyzsýmen qamtý kórsetkishi tómen óńirler ataldy

NUR-SULTAN. QazAqparat – Sýmen qamtamasyz etý deńgeıin artyrý úshin kórsetkishteri tómen óńirlerge basym negizde qarajat bólinedi. Bul týraly QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Memleket basshysynyń tapsyrmasyna sáıkes 2025 jylǵa deıin el halqyn túgeldeı sapaly aýyz sýmen qamtamasyz etýimiz qajet. Bul mindet «Qýatty óńirler – el damýynyń draıveri» ulttyq jobasy sheńberinde iske asyrylady», - dedi Beıbit Atamqulov Úkimettiń búgingi otyrysynda.

Mınıstrdiń aıtýynsha, 2020 jyly eldegi sýmen jabdyqtaý qyzmetterine qoljetimdilik 94,1% qurady, onyń ishinde: aýyldarda - 90,1%, qalalarda - 97,5 %.

«Jyl sońyna deıin bul kórsetkish aýyldarda – 91,8%, qalalarda – 98% jetýi tıis. Búgingi tańda óńirlerde taza sýǵa qoljetimdilik ártúrli deńgeıde. Aýyz sýmen qamtý deńgeıi 3 óńirde: Atyraý, Almaty, Qyzylorda oblystarynda joǵary. Jekelegen óńirlerde artta qalý baıqalady. Aýyl halqyn aýyzsýmen qamtý deńgeıi 4 óńirde eń tómen. Olar: Qostanaı, Shyǵys Qazaqstan, Soltústik Qazaqstan jáne Jambyl oblystary», - dedi ol.

Sýmen qamtamasyz etý deńgeıin artyrý úshin kórsetkishteri tómen óńirlerge basym negizde qarajat bólinedi.

Sondaı-aq, «Aýyl - el besigi» arnaıy jobasyna engizilgen aýyldarǵa jáne Óńirlerdi damytýdyń keshendi josparlaryna engizilgen jobalarǵa basymdyq beriledi.