Aýyldardy aýyz sýmen qamtýǵa jylyna 100 mlrd teńge bólinedi
ASTANA. QazAqparat - QR Investıtsııalar jáne damý mınıstri Jeńis Qasymbek aýyldy eldi mekenderdi ortalyqtandyrylǵan aýyz sýmen jabdyqtaý máselesi týraly aıtty, dep habarlaıdy «QazAqparat» HAA tilshisi.
«Aýyldy eldi mekenderdi ortalyqtandyrylǵan aýyz sýmen jabdyqtaý qoljetimdiligin 59 paıyzǵa, al qalalarda 94 paıyzǵa jetkizý josparlanyp otyr. Aýyldar men qalalardy sapaly ári taza aýyz sýmen qamtamasyz etý maqsatynda 332 joba (onyń 282-i aýylda, 50-i qalada) qolǵa alynyp, 2018 jyly atalǵan jobalardy júzege asyrý úshin bıýdjetten 93,3 mıllıard teńge qarastyrylǵan», - dedi mınıstr OKQ-da ótken baspasóz máslıhatynda.
Mınıstrdiń aıtýynsha, atalmysh baǵytta bólinetin qarajat 2017 jylmen salystyrǵanda, 67,5 paıyzǵa artyq. Sonymen qatar, Jeńis Qasymbek aýyl sý máselesin sheshý úshin qarjylandyrýdy odan ary arttyrý amaly qarastyrylyp jatqanyn tilge tıek etti.
«Memleket basshysynyń tapsyrmasyna sáıkes, barlyq qarajat kózderiniń esebinen aýyl turǵyndaryn aýyz sýmen qamtý maqsatynda qarjylandyrýdy jyl saıyn 100 mıllıard teńgege deıin jetkizý kózdelgen. Respýblıkalyq bıýdjetten tys, birqatar ákimdikter osy jobalardy oblys ortalyqtarynda júzege asyrý úshin búgingi kúni ár túrli banktermen, halyqaralyq qarjylyq uıymdarmen belsendi jumys júrgizip jatyr», - dep túıdi Jeńis Qasymbek.
