Aýyldardy aýyz sýmen qamtýdyń eń tómengi deńgeıi eki oblysta tirkeldi – Qaıyrbek Óskenbaev

NUR-SULTAN. QazAqparat – Sýmen jabdyqtaý qyzmetterimen 100 paıyz qamtý úshin bıýdjetten 498 mlrd teńge qaralǵan. Bul týraly Parlament Májilisindegi tyńdaýda Indýstrııa jáne ınfraqurylymdyq damý mınıstri Qaıyrbek Óskenbaev málim etti, dep habarlaıdy QazAqparat tilshisi.

«Memleket basshysy byltyrǵy Joldaýynda 2025 jyly halyqty sapaly aýyz sýmen qamtýdy 100 paıyzǵa jetkizýdi tapsyrdy. Osy maqsatta, «Qýatty óńirler – el damýynyń draıveri» Ulttyq jobasy aıasynda 2025 jyly atalǵan kórsetkishti tolyq oryndaý josparlanǵan. 2021 jyldyń qorytyndysyna sáıkes, sýmen jabdyqtaý qyzmetterimen qamtý respýblıka boıynsha 96 paıyzdy, onyń ishinde aýyldarda 93 paıyzdy qurady», - dedi Q.Óskenbaev.

Onyń aıtýynsha, jekelegen óńirler bul baǵyttaǵy jumystar boıynsha artta qalyp otyr. Aýyldardy aýyzsýmen qamtýdyń eń tómengi deńgeıi Qostanaı (74,9%) men Soltústik Qazaqstan oblystarynda (83,5%) tirkeldi.

«2021-2025 jyldarǵa arnalǵan Ulttyq joba aıasynda sýmen jabdyqtaý qyzmetterimen 100 paıyz qamtý úshin respýblıkalyq bıýdjetten 498 mlrd teńge, onyń ishinde aýyldarǵa 261 mlrd teńge qaralǵan. Bıyl aýyldardy aýyz sýmen qamtamasyz etý deńgeıin 94,7 paıyzǵa jetkizýdi josparlap otyrmyz», - dedi mınıstr.

Onyń sózine qaraǵanda, elimizde 6 302 aýyldy eldi meken bolsa, onyń 4 759-y sýmen qamtylǵan. Qalǵan 1 543 aýyldy kezeń-kezeńimen qamtamasyz etý jospary ázirlendi, onda respýblıkanyń árbir eldi mekeni esepke alyndy.

«Qamtamasyz etilmegen aýyldardyń 511-inde ortalyqtandyrylǵan sýmen jabdyqtaý qurylysy josparlanyp otyr. Al halqy az 1 032 aýylda (200 adamnan tómen) jergilikti bıýdjet qarajaty esebinen keshendi blok-modýlder (KBM) ornatylady. Onyń ishinde bıyl taǵy 120 aýyldy ortalyqtandyrylǵan sýmen qamtamasyz etý jáne halqy az 220 aýylǵa KBM ornatý josparlanǵan», - dedi vedomstvo basshysy.

Budan buryn habarlanǵandaı, 2040 jylǵa qaraı Qazaqstanda sý tutyný deńgeıi 46 paıyzǵa artýy múmkin.