Aýyldardaǵy sý qubyrlary birneshe jylda isten shyǵýy múmkin
Senatordyń aıtýynsha, aýyldy sýmen jabdyqtaý júıesi men sý qubyrlarynyń qurylysyna qaramastan, bul nysandardy kútip ustaý boıynsha mamandandyrylǵan kásiporyndar qarastyrylmaǵan. Osy oraıda, salynǵan sý qubyrlary ákimdikterdiń esebine qoıylady nemese bilikti mamandary men arnaıy tehnıkasy joq basqa kásiporyndardyń qaramaǵyna berilip keledi.
«603 aýylda sýmen jabdyqtaý júıesine qatysy joq kásiporyndar jaýapty nemese sý qubyrlary ákimdikterdiń balansyna tirkelgen. Sapasyz tehnıkalyq qyzmet kórsetýdiń saldarynan sý tazartý jabdyqtary únemi isten shyǵyp jatady. Osy jaǵdaıda sý tazartý júıeleriniń jumysy tolyqtaıy toqtaýy múmkin. Munyń saldarynan halyq qaıtadan tazartylmaǵan sý ishedi. Demek, halyqty taza aýyz sýmen qamtamasyz etý baǵdarlamasy óz mánin joǵaltyp, bólingen bıýdjet qarajaty bosqa shyǵyn bolady», - dedi E. Áıtkenov Premer-Mınıstr Álıhan Smaıylovtyń atyna joldaǵan depýtattyq saýalynda.
Depýtattyń sózine qaraǵanda, elimizde aýyz sýmen jabdyqtaý salasyna eki mınıstrlik jaýap beredi. Indýstrııa jáne ınfraqurylymdyq damý mınıstrligi eldi mekenderdiń ishindegi máselege, al Ekologııa mınıstrligi eldi mekenderden tys jerlerdegi is-sharalarǵa jaýapty. Osy oraıda, bul qyzmetterdi bir memlekettik organda shoǵyrlandyrýdy usyndy.
«Basqarýdy utymdy etý úshin sýmen jabdyqtaý jónindegi fýnktsııalardy bir memlekettik organǵa shoǵyrlandyrý máselesin sheshý kerek. Sondaı-aq, sý qubyrlaryn kútip ustaý jónindegi respýblıkalyq deńgeıde biryńǵaı operator qurý múmkindigin qarastyrý usynylyp otyr», - dedi Ernur Aıtkenov.
