Aýyldardaǵy dáriger tapshylyǵy máselesin sheshý úshin jas kadrlardy yntalandyrý kerek - Altaı Kólginov

ÓSKEMEN. QazAqparat – Shyǵys Qazaqstan oblysyna jumys saparymen kelgen Premer-Mınıstrdiń orynbasary Altaı Kólginov Óskemendegi birqatar nysandy aralady, dep habarlaıdy QazAqparat tilshisi.

Altaı Kólginov qaladaǵy ústel tennısi ortalyǵynyń, O.Rypakova atyndaǵy jeńil atletıka manejiniń jumysymen tanysty. Sodan soń kópsalaly gematologııa ortalyǵynyń qurylys jumystaryn baqylady.

«Gematologııa ortalyǵy biregeı medıtsınalyq nysan bolmaq. Munda zamanaýı jabdyqtar ornatý josparlanýda. Mamandar jańa tehnologııalar boıynsha jumys isteıtin bolady. Biz osy ortalyq úshin kadr daıarlaýmen aınalysýdamyz. Sońǵy 3 jylda Germanııada, Izraılde, Reseıde 35 mamandy oqyttyq. Medbıkeler mektebi ashyldy. Onda osy ortalyqta jumys isteıtin orta medpersonaldy daıarlaýdy bastadyq», - dedi ShQO densaýlyq saqtaý basqarmasynyń basshysy Gúlmıra Saǵıdýllına.

ShQO ákimi Danıal Ahmetovtyń aıtýynsha, mundaı ortalyq Reseıde de, Ortalyq Azııada da joq. Sodan keıin Premer-Mınıstrdiń orynbasary bastaǵan delegatsııa oblystyq ana men bala ortalyǵyna bardy.

«Aýyldarda medıtsınana damytý úshin el boıynsha 600-ge jýyq nysan salynady. Taǵy 32 aýdanaralyq aýrýhana jańǵyrtylady. Óskemende boı kóteretin zamanaýı gematologııa ortalyǵy óńirdiń medıtsına servısiniń sapasyn arttyrý úshin óte mańyzdy. Medıtsınalyq jabdyqtar boıynsha densaýlyq saqtaý mınıstrligi járdem kórsetetin bolady. Jalpy, densaýlyq saqtaý júıesi boıynsha baıypty jumys istep, eldi mekenderdegi dáriger tapshylyǵy máselesin sheshýimiz kerek. Ol úshin aýdandarda jumys isteýge jas kadrlardy yntalandyrý maqsatynda kóterme járdemaqy bólý qajet. Qarjy mólsheri de joǵary bolǵan jón», - dedi Altaı Kólginov.