Aýyldarda úsh jyl ishinde 183 zamanaýı mektep salynady
«Oqý-aǵartý mınıstrligi jergilikti atqarýshy organdarmen birlesip, turǵylyqty jerine qaramastan orta bilimniń qoljetimdiligin qamtamasyz etý maqsatynda birqatar keshendi is-sharalardy iske asyrýda. Bilim berý uıymdaryn jetkilikti qarjylandyrýdy qamtamasyz etý úshin aýyl mektepterin jan basyna shaqqandaǵy qarjylandyrýǵa kezeń-kezeńimen kóshirý 2025 jyly tolyq júzege asyrylady. Aýyldyq jerlerge joǵary bilikti pedagogterdi tartý maqsatynda muǵalimder tapshy óńirler úshin tıisti qoldaý is-sharalary toptamasymen Úzdik pedagogterdi tartý jónindegi arnaıy baǵdarlama iske asyrylýda. Bul baǵdarlama bilikti jáne yntaly pedagogterdi tartý jáne qaldyrý arqyly bilim berý sapasyn jaqsartýǵa baǵyttalǵan», - dep atap ótedi Úkimet basshysy jaýabynda.
Sondaı-aq Á.Smaıylov 2025 jylǵa deıin shaǵyn qalalarda, aýdan ortalyqtarynda jáne aýyldarda 5 myń mektep jańǵyrtylatyndyǵyn atap ótedi.
«Budan basqa, «Jaıly mektep» pılottyq ulttyq jobasy aıasynda 2026 jylǵa deıin aýyldyq jerlerde zamanaýı talaptar men biryńǵaı standarttar boıynsha 183 mektep salynady. 2022 jylǵy shilde aıynan bastap, «Qazaqstan halqyna» qoǵamdyq qory, «Nazarbaev Zııatkerlik mektepteri» DBBU jáne «Bilim berýdi turaqty damytý qory» qoǵamdyq qory birlesip, «Aýyldyq jerlerde tirek mektepterdiń áleýetin damytý» jobasyn iske asyrýda. Bul jobanyń basty maqsaty – aýyl balalaryna sapaly bilim alýǵa, al muǵalimder úshin kásibı quzyrettilik deńgeıin arttyrýǵa teń múmkindikter berý», - dedi Premer-Mınıstr.
