Aýyldarda mobıldi qoǵamdyq keńistikter uıymdastyrylady
Atyraý, Túrkistan oblystary men Almaty qalasynda Aqparat jáne qoǵamdyq damý mınıstrliginiń qoldaýymen «Jastar keńistigi» jobasy iske asyrylyp jatyr. Joba sheńberinde «Áleýmettik jobalar qory» KQ mobıldi qoǵamdyq keńistikterdi qurady, otbasylyq-tanymdyq demalysty uıymdastyryp, dáripteıdi.
«Joba aıasynda biz aýyl jastaryna erekshe kóńil bólemiz. Jastardyń oblys ortalyqtaryna jetýine qıyndyq keltirmeý úshin bizdiń jattyqtyrýshylar óńirlerdi ózderi aralaıtyn bolady. Aýyldarda biz jastardy baǵdarlamalaý, mobılografııa, SMM, akterlik sheberlik sııaqty suranysqa ıe mamandyqtarǵa, sondaı-aq alǵashqy medıtsınalyq kómek kórsetý daǵdylaryna oqytamyz. Jalpylaı alǵanda, Túrkistan jáne Atyraý oblystaryna qarasty 10 aýyldyń 200-den astam jas turǵynyn oqytý kýrstarymen qamtýdy josparlap otyrmyz», - deıdi joba jetekshisi Erbol Keńgerbaev.
Onyń aıtýynsha, qysqa merzimdi oqytý kýrstarynan alǵashqy bolyp Atyraý oblysy Qyzylqoǵa aýdanyna qarasty Mııaly aýylynyń jastary ótedi. Munda mobıldi qoǵamdyq keńistikter 1-3 shilde aralyǵynda jumys isteıdi.
Al, otbasylyq mádenı demalysty nasıhattaý maqsatynda qoǵam belsendileri balalar men jasóspirimderge arnalǵan túrli úıirmeler uıymdastyrýǵa nıetti.
«Biz eski otbasylyq dástúrlerdi jandandyrǵymyz keledi. Barlyq otbasy múshelerin aýlalardy abattandyrý, qus úılerin ornatý sııaqty is-sharalarǵa qatystyrmaqpyz. Ýaqytty osylaısha birlese ótkizý otbasy ınstıtýtyn damytýǵa jaǵymdy áser etedi, ekologııalyq turǵyda habardarlyqty arttyrady, otbasylyq-mádenı demalystyń damýyna yqpal etedi dep senemiz.
Sondaı-aq, biz «Mýzeıdegi tún», kıno keshteri sııaqty is-sharalardy ótkizemiz, synı oılaýdy damytý maqsatynda pikirsaıys úıirmelerin, qarjylyq saýattylyqty arttyrý jáne «Bıznes jastyq» áleýmettik beıimdelý jónindegi is-sharalardy uıymdastyramyz», - dedi Erbol Keńgerbaev.
Aıta keteıik, «Jastar keńistigi» jobasy 2024 jyldyń sońynda aıaqtalady. Joba týraly tolyq aqparat pen jattyqtyrýshylardyń kestesi «Jastar.Kenistigi» Instagram paraqshasynda kórsetilgen.