Aýyldarda dárihanalardyń tapshylyǵy sezilýde – Álı Bektaev

NUR-SULTAN. QazAqparat - Senator Álı Bektaev QR Premer-Mınıstri Asqar Mamınniń atyna aýyl medıtsınasynyń jaı-kúıine qatysty depýtattyq saýal joldady, dep habarlaıdy QazAqparat tilshisi.

Depýtattyń aıtýynsha, «Aýyl» partııasynyń belsendileri men eriktileri 200-ge jýyq eldi mekendi aralap, jergilikti densaýlyq saqtaý mekemeleriniń múmkindikterimen tanysqan. Sonyń nátıjesinde aýyldyq aýrýhanalardaǵy jaǵdaı kúrdeli ekeni anyqtalǵan.

Depýtat aýyldyq eldi mekenderde turǵyndardy emdeýge beıimdelgen statsıonarlardyń tapshylyǵyn sóz etti.

Sonymen qatar senator aýyldyq jerlerdegi qyzmet etip turǵan dárigerlik ambýlatorııalar men feldsherlik-akýsherlik pýnktterdiń materıaldyq jaǵdaıynyń nasharlyǵyna toqtaldy.

Á. Bektaevtyń aıtýynsha, aýyldarda qyzmet etetin dárihanalardyń tapshylyǵy sezilýde.

«Naryq talaptaryna saı aýyl turǵyndary tabysynyń tómendigine baılanysty aýyldyq jerlerde jekemenshik dárihanalar atymen joq. Al medıtsına mekemelerin dári-dármekpen qamtamasyz etýdiń deńgeıi óte tómen. ıAǵnı, aýyldyqtardy dári-dármekpen qamtamasyz etý kúrdeli problemaǵa aınalyp otyr dep aıtýǵa bolady», - dedi senator.

Depýtat aýyldaǵy ambýlatorııalar men feldsherlik-akýsherlik beketterde qyzmet isteıtin dárigerlerdiń kásibı deńgeıiniń tómen ekenin, mamandardyń jetispeýshiligi baıqalatynyn da tilge tıek etti.

Osy máselelerdi aıta kelip, senator halyq sany 3 myńnan asatyn árbir eldi mekende óziniń dárihanasy, jedel járdemi men perzenthanasy bar aýyldyq aýrýhanalardy qalpyna keltirýdi tez arada qolǵa alǵan jón degen usynysyn bildirdi.

«Qajet jaǵdaıda medıtsına qyzmetkerlerin turǵyn úımen qamtamasyz etýdiń de, kóshpeli dárihanalardy uıymdastyrýdyń da turaqty sharalaryn qarastyrǵan durys», - dedi Álı Bektaev.