Aýyldarda ajyrasý 37 paıyzǵa kúrt ósken, qalada nekesin buzatyndar az
Bıylǵy І toqsannyń qorytyndysy boıynsha elimizde 24,5 myń jup neke qıǵan. Bul ótken jyldyń tıisti kezeńimen salystyrǵanda 10,6%-ǵa az.
Qalalarda tirkelgen neke sany 28,1%-ǵa qysqarsa, aýyldarda kerisinshe 55,6%-ǵa ulǵaıyp, 8,9 myńǵa deıin ósti.
Úsh aıda 3,9 myń jup ajyrasty. Byltyrmen salystyrǵanda ajyrasý 5,6%-ǵa azaıǵan.
Bul rette qala halqynyń arasynda nekesin buzǵandar az. Degenmen ajyrasý aýyldyq eldi mekenderde 36,8%-ǵa kúrt artty.
Óńirler boıynsha eń kóp neke Túrkistan oblysynda tirkeldi. Bıylǵy 3 aıda bul aımaqta 2,8 myń jup otaý qurdy.
Sonymen qatar, Almaty qalasy men (2,5 myń neke tirkeldi) Almaty oblysynda da (2,2 myń neke tirkeldi) shańyraq kótergender qatary kóp.
Jalpy el boıynsha eń az neke Ulytaý oblysynda tirkelgen. Munda 264 jup otbasyly boldy.
Al, ajyrasý derekteri boıynsha Almaty (494 jup ajyrasty) qalasy kósh bastap tur.
Keıingi orynda - Astana (351 jup ajyrasty) jáne Qaraǵandy oblysy (341 jup ajyrasty).
Bul rette nekesin buzǵandar Ulytaý, Qyzylorda jáne Atyraý oblystarynda az.
Aqparat jáne qoǵamdyq damý komıteti júrgizgen saýalnama qortyndysyna saı, qazaqstandyqtardyń kóbi ajyrasýdy quptamaıdy.
Atap aıtqanda, saýalnamaǵa qatysqan respondentterdiń 39,8%-y ajyrasýǵa jol bermeý kerek dep esepteıdi.
Al 41,3% ajyrasý durys emes, degenmen únemi janjalǵa qaraǵanda nekeni buzý tıimdi degen kózqarasta.
Al halyqtyń 12,8% ajyrasý ómirge oń áser etedi dep sanaıdy.
Saýalnamaǵa qatysýshylar ajyrasýdyń sebebi retinde erli-zaıyptylardyń bireýiniń ishimdikke salynýy nemese nashaqor bolýy (61,7%), otbasyndaǵy zorlyq-zombylyq (51,1%), qumar oıyndar (47%), kózge shóp salýdy atady (38,4%).
