Aýyldarda aýyzsý, jaıylym, jol máselesi sheshilse deımiz – saılaýshy

TÚRKІSTAN. QazQaparat - Túrkistan oblysyndaǵy emdeý mekemelerinde jatqan naýqastar da búgin bir kisideı daýys berýde. Oblystyq klınıkalyq aýrýhanada 650 naýqas emdelip jatyr, dep habarlaıdy QazAqparat tilshisi.

Aýrýhanadaǵy 200-den astam naýqas saılaý ýchaskesine óz betimen kelip, daýys berýde. Olardyń barlyǵy derlik alys-jaqyn aýdandardyń turǵyndary. Bazbiri qolarbamen kelip, óz tańdaýyn jasaýda.

Turǵylyqty jerleri ártúrli bolǵandyqtan bul saılaýshylar tek partııaǵa daýys beretin bolady. Solardyń biri Qazyǵurt aýdanynan kelgen Dilbar Imanqulova búgingi saılaýdan kóp úmit kútetinin aıtady.
«Búgingi saılaý men úshin de, otbasym men aýyldastyrym úshin óte mańyzdy dep aıtar edim. Sebebi kóp ózgeris bolady dep úmittenemiz. Ásirese kóp jyldar boıy qordalanǵan aýyldardaǵy aýyzsý, jaıylym, jol máselesi sheshilse deımiz. Osy halyqqa jany ashıtyn, eldiń qamyn oılaıtyn azamattar saılansa degen tilegimiz bar», - deıdi Dilbar Imanqulova.
Al aýrýhanadaǵy ózdiginen júrip tura almaıtyn naýqastarǵa saılaý ýchaskesiniń ókilderi palataǵa baryp, daýystaryn qabyldaýda. Olardyń sany 400-den astam. Aıta keteıik, búgin óńirde 1 mln 168 myńnan astam adam daýys berýge qatysatyn bolady.