Aýyldarda arnaıy keńes jumys isteıtin bolady

NUR-SULTAN. QazAqparat – 2024 jyldan bastap elimizdiń aýyldyq eldi mekenderinde arnaıy keńes qurylady. Bul týraly QR Ulttyq ekonomıka mınıstrligi Óńirlerdi taldaý jáne jergilikti ózin-ózi basqarýdy damytý departamenti dırektorynyń orynbasary Mırjan Imanbaev málim etti, dep habarlaıdy QazAqparat tilshisi.

«2021-2025 jyldarǵa arnalǵan jergilikti ózin-ózi basqarý tujyrymdamasyna sáıkes 2024 jyldan bastap elimizde aýdan ákimderiniń saılaýy ótpek. Jergilikti ózin-ózi basqarýǵa qatysty taǵy bir jańalyq, aýyldyq jerlerde keńes qurylady. Negizi buǵan deıin de aýyldyq okrýgterde jergilikti qoǵamdastyq degen organ boldy, biraq onyń zańdy kúshi bolmady. ıAǵnı qoǵamdastyq tek usynys bildirýge quqyly edi. Endi sol qoǵamdastyqty keńes dep atap, onyń quzyreti men qyzmetin jandandyrmaqpyz. Keńes músheleri saılanyp, olarǵa depýtat sekildi quzyret beriledi. Keńes múshelerin aýyl halqy ózi saılaıdy. Keńes sol aýyldaǵy máselelerdi nazarda ustap, onyń sheshilýine atsalysady. Halyq pen ákim arasyndaǵy kópir desek te bolady. Eldi mekenderde keńes jumysyn bekitip, onyń múshelerin saılaý 2024 jylǵa josparlanyp otyr», - dedi Mırjan Imanbaev.

Odan bólek, mınıstrlik ókili aýyl bıýdjetine qatysty jańashyldyqpen tanystyrdy.

«2018 jyldan bastap aýyl ákimdikterine bıýdjetti basqarý quzyreti berildi. Búginde aýyldyq okrýgter 6 salyq túri boıynsha óz tabystaryn qazynaǵa quıyp otyr. Degenmen bul 10-15 paıyzdy ǵana quraıdy, al qalǵan 80-85 paıyz qarajat aýdandyq bıýdjetten qarastyrylady. Osy oraıda biz aýyldyq eldi mekender úshin qosymsha salyq arqyly kiris kózin ashpaqpyz. Atap aıtqanda, 2022 jyly 4 salyq jáne 2024 jyly taǵy birneshe salyq túri engiziledi. Osylaısha 2025 jyly aýyl bıýdjetiniń 3/1 bóligin ózderi qamtı alady. Odan bólek, aýyl bıýdjetine qatysty qaǵazbastylyq máselesi bar, ony joıý úshin protsesti elektrondy júıege kóshirý qarastyrylyp jatyr», - deıdi ol.

Buǵan deıin habarlaǵanymyzdaı, elimizde jergilikti ózin-ózi basqarýdyń 2021-2025 jyldarǵa arnalǵan tujyrymdamasy qabyldandy.