«Aýyldan shyqqan mıllıoner»: Balalarǵa arnalǵan jańa kitap jaryq kórdi
NUR-SULTAN. QazAqparat – QR Ulttyq Akademııalyq kitaphanasynda jazýshy, QR eńbek sińirgen qaıratkeri Sáýle Dosjannyń jasóspirimderge arnalǵan «Aýyldan shyqqan mıllıoner» kitaby tanystyryldy, dep habarlaıdy QazAqparat tilshisi.
Kitap «Aýyl» Halyqtyq-demokratııalyq patrıottyq partııasynyń qoldaýymen jaryq kórgen.
«Memleket basshysy Qasym–Jomart Toqaev «Egemen Qazaqstan» gazetinde jaryq kórgen «Táýelsizdik bárinen qymbat» maqalasynda qazaq qalamgerleriniń balalarǵa arnalǵan úzdik shyǵarmalaryn kóptep basyp shyǵarýdy jáne taratýdy qolǵa alý kerek ekenin atap ótken bolatyn. Memleket basshysy osy máselege der kezinde nazar aýdaryp otyr. Qazaqtyń kórkem sóz ónerinde balalar ádebıetiniń dińgegi myqty dástúri bar edi. Tipti ádebıetimizdiń álippesi sanalatyn aýyz ádebıetimizde balalardyń tanym-túsinigi men qııalyna áser etetin qanshama jaýhar dúnıeler bar. Kezinde Berdibek Soqpaqbaev, Ótebaı Turmanjanov, Qadyr Myrzalıev, Qalqaman Ábdiqadyrov, Ánýarbek Dúısenbıev sııaqty aqyn-jazýshylarymyz balalar ádebıetiniń shedevrlerin dúnıege ákeldi emes pe? Qazir bul dástúr nege úzilip qaldy degen zańdy suraq týyndaıdy (...) «Aýyl» partııasy osy ıgi bastamaǵa alǵashqylardyń biri bolyp ún qosyp, Sáýle Dosjannyń «Aýyldan shyqqan mıllıoner» kitabyn basyp shyǵaryp, týyndynyń tusaýkeserin uıymdastyrdy», - dedi «Aýyl» partııasynyń tóraǵasy Álı Bektaev kitaptyń tusaýkeserinde.
Onyń aıtýynsha, hıkaıat keıipkeri Jomart sekildi jas mıllıonerler ár aýyldan shyqty. Biraq olardyń qıyndyq pen qyzyqqa toly hıkaıalary kórkem shyǵarma bolyp jazylmaǵan.
«Sáýle Maǵazbekqyzy osyndaı aýyldan shyqqan mıllıoner azamattardyń jıyntyq keıpin jasap otyr. Kitapta erte jastan eńbekke beıimdelý, zamannyń aýanyn dóp basyp, tirshilikke aralasý, sol arqyly dittegen maqsatyna jetý sııaqty qazirgi jastarǵa aýadaı qajet motıvatsııalyq sıýjetter sheber órilgen. Balanyń eseıe kele anasyna qaraılasýy da ulttyq tárbıe men ulttyq qundylyqtardyń kórkem týyndydaǵy ádemi kórinisi ekeni anyq», - deıdi partııa basshysy.
Sonymen birge, tusaýkeserge kelgen belgili pýblıtsıst, qalamger, QR Parlamenti Senatynyń depýtaty Nurtóre Júsip qazaq balalar ádebıetiniń búgingi jaı-kúıine toqtalyp, qazirgi jas oqyrmandardyń ishki suranysyna jaýap beretin «Aýyldan shyqqan mıllıoner» sııaqty shyǵarmalardyń asa qajet ekenin atap ótti.
«Bul meniń onshaqty jyl kókeıimde júrgen taqyryp boldy. «Altyn qalam» baıqaýyna qatysqanda bul shyǵarma 41 myń daýys jınady. Jeńiske jetpese de, halyqtyń yqylasyna bólendi. Sonda Álı myrza saıttan baıqap qalyp, ózi habarlasyp, kitap etip shyǵarýdy usyndy. Ol úshin árıne zor alǵys aıtamyn. Hıkaıadaǵy Jomart – ózime eń jaqyn keıipker. Óıtkeni, meniń armanym – qazaqtyń balalarynyń Jomart sııaqty bolýy. Aýyldaǵy balalardyń árqaısysy óz deńgeıinde qıyndyq kórip júr, áleýmettik jaǵdaı qıyn. Biraq, sol balalardyń úmiti bolýy kerek, keýdelerine sáýle jaǵatyn adam bolýy kerek (...) Ulttyq kitaphana da bıyl balalar ádebıetine kóńil bólip jatyr, balalarǵa arnaıy burysh uıymdastyrdy. Sol úishn bıyl tek balalarǵa arnalǵan shyǵarmalar jazyp júrmin. Qazir Jaqsylyq Úshkempirov týraly «Birtýar» romanyn jazyp jatyrmyn», - deıdi kitap avtory Sáýle Dosjan.
«Aýyldan shyqqan mıllıoner» myń tırajben jaryq kórgen jáne satylymǵa shyǵarylmaıdy. Kitaptyń 100 danasy QR Ulttyq akademııalyq kitaphanasyna berildi jáne qalǵany aýyl kitaphanalaryna tegin taratylady.
