Aýyldan shyqqan 1 myń bala elimizdiń jetekshi mektepterinde bilim alady
«Elbasy Akademııasy» korporatıvtik qorynyń uıytqy bolýymen QR Bilim jáne ǵylym mınıstrligi uıymdastyrǵan «Myń bala» olımpıadasy – aýyl balalaryn qoldaýǵa jáne damytýǵa baǵyttalǵan ulttyq aýqymdaǵy biregeı joba.
Bıylǵy olımpıadaǵa qatysý úshin aýyl mektepteriniń 5-6 synyptary arasynda 150 myńǵa jýyq oqýshy tirkeldi. І kezeńge 132 myńnan astam oqýshy qatysty, eń kóp ball jınaǵan 5 myń fınalıst irikteldi. Qatarlastarynan ozǵan 1 myń bala olımpıada jeńimpazy atandy. Olar elimizdiń daryndy balalarǵa arnalǵan jetekshi mektepterinde: Respýblıkalyq fızıka-matematıka mektebinde, «Bilim-Innovatsııa» lıtseılerinde, «Daryn» mamandandyrylǵan mektepterinde oqýǵa múmkindik alady. Aıta ketý kerek, el boıynsha qatysýdyń joǵary kórsetkishin Qyzylorda, Almaty, Batys Qazaqstan oblystarynyń oqýshylary kórsetti.
Olımpıada eki kezeńnen turady. Birinshi kezeń logıkalyq jáne keńistiktik oılaýdy baǵalaýǵa arnalǵan tapsyrmalardy qamtydy. Eń joǵary ball jınaǵan 5 myń oqýshy ekinshi kezeńge joldama aldy.
Ekinshi kezeń óńirlik testileý ortalyqtary bazasynda uıymdastyryldy. Qatysýshylar matematıkalyq saýattylyq, qazaq, orys, aǵylshyn tilderi men jaratylystaný pánderi boıynsha akademııalyq bilimge baǵa beretin kompıýterlik testileýge qatysty.
«Jyl saıyn qatysýshylar sanynyń ósip kele jatqanyn kórip otyrmyz. Bul jobanyń suranysqa ıe ekendigin kórsetedi. «Myń bala» olımpıadasynyń arqasynda shalǵaıdaǵy aýyldyq óńirlerden kelgen myńdaǵan bala ozyq bilim berý tehnologııalary men sapaly bilimge qol jetkize alady», - dedi bilim dodasynyń qorytyndysyna arnalǵan baspasóz máslıhatynda «Elbasy Akademııasy» KQ dırektory Aslanbek Amrın.
