Aýyldaǵylar qala halqyna qaraǵanda asa joǵary energetıkalyq qundy tamaqtarmen tamaqtanady
ASTANA. QazAqparat - QR Ulttyq ekonomıka mınıstrligi Statıstıka komıtetiniń 2014 jylǵy úı sharýashylyqtarynyń irikteme zertteý derekteri boıynsha elimizde tamaqtaný kalorııasy shekti deńgeıden tómen halyqtyń úlesi 1,3 paıyzdy qurap otyr.
«Bul kórsetkishtiń aıtarlyqtaı saralanýy halyqtyń turǵylyqty jerine qaraı baıqalady. Atap aıtqanda, 2014 jyly qalalyq jerdegi tamaqtaný kalorııasy shekti deńgeıden tómen halyqtyń úlesi aýyldyq deńgeıden 2eseden astam ósti. Qala men aýyl arasyndaǵy aıyrmashylyq aýyldyq jerdegi halyqtyń tutynǵan tamaq ónimderiniń asa joǵary energetıkalyq qundylyǵymen, sondaı-aq olardyń tutyný ratsıonynyń teńgerimdelgenimen túsindiriledi», - delingen baspasóz baıanynda.
Málimetterge qaraǵanda, tamaqtaný kalorııasy shekti deńgeıden tómen halyqtyń sany qalalyq jerlerde 177,6 myń adamdy qurasa, aýyldyq jerlerde bul kórsetkish 60,4 myń adam bolyp otyr. Sonymen qatar, derekterge úńilsek, 2014 jylǵy tutynylǵan tamaq ónimderiniń energetıkalyq qundylyǵy kúnine ortasha jan basyna 3 213 kkal quraǵan.
«Eger halyq tutynǵan tamaq ónimderiniń hımııalyq quramyn qarastyratyn bolsaq, onda qalada maılardan turatyn (et, et ónimderi, balyqtyń maıly túrleri) tamaq ónimderin kóbirek tutynatyndyǵyn, al aýyldyq jerde kómirsýlarmen baı (jarma ónimderi, makarondar, nan jáne sol sekildi ) taǵam basym ekendigin atap aıtýǵa bolady. Bul qala men aýyl arasyndaǵy osy tamaq ónimderiniń quny jáne qoljetimdilik aıyrmashylyǵyna negizdelip otyr», - delingen baspasóz baıanynda.
