Aýyldaǵy jeke sharýashylyqqa beriletin shaǵyn nesıe 5 mln. teńgege deıin ósedi - T. Dúısenova
Bul týraly búgin Úkimet otyrysynda Eńbek jáne halyqty áleýmettik qorǵaý mınıstriniń mindetin atqarýshy Tamara Dúısenova málimdedi.
«Jumyspen qamtý jol kartasy - 2020» baǵdarlamasy aıasynda aýyldaǵy jeke kásipkerlikter arqyly turǵyndardy jumyspen qamtý baǵyty qarastyrylady.
T. Dúısenovanyń aıtýynsha, atalǵan baǵyt, birinshiden, aýyldaǵy jeke kásipkerlikpen aınalysqysy keletinderge qoldaý bolady. Atalǵan sharalar sheńberinde aýyl turǵyndarynyń óziniń jeke sharýasyn ashyp, ony damytýǵa degen bastamasyn qoldaıtyn tetikter iske asyrylyp, «Jumyspen qamtý - 2020» baǵdarlamasynda qolǵa alynǵan shaǵyn nesıeleý mehanızmi usynylady. Bul 3 mln. teńgege deıin shaǵyn nesıe berilip, ınjenerlik-kommýnıkatsııalyq ınfraqurylym nysandarynyń jetispeıtin bólikterin salý jáne damytý, sondaı-aq, basqa da túrli qyzmetter kórsetý degen sóz.
Ekinshiden, tirek aýyldaryn keshendi túrde damyta otyryp, belgili bir aýyldaǵy azamattardy jumyspen qamtýda memleket qoldaýyn bir arnaǵa toǵystyrý.
Sonymen qatar, árbir naqty aýyl úshin jeke-jeke keshendi damytýdyń sheberlik-jospary jasalyp, olar jergilikti qaýymdastyqpen kelistiriletin bolady. Sheberlik-jospar aýyldyq eldi mekendi damytyp, ondaǵy jumys oryndaryn qurýda qajet bolatyn barlyq ınfraqurylymdardyń salynýyn, jumys oryndarynyń ashylýyn, jáne basqa da sharalardy qamtıdy.
Taǵy atap ótetini, T. Dúısenovanyń aıtýynsha, shaǵyn nesıeleý boıynsha jasalatyn jumystar da jalǵasyn tabady. «Birinshi baǵyttan aıyrmashylyǵy, aýyldaǵy bir qosalqy jeke sharýashylyqqa beriletin shaǵyn nesıe kólemi 5 mln. teńgege deıin ósedi. Qaryz alýshyǵa beriletin syıaqy mólsheri 6%-dan aspaıtyn bolady», - dedi T. Dúısenova.
«Jumyspen qamtý jol kartasy - 2020» baǵdarlamasynyń atalǵan baǵytyna 25,7 mlrd. teńge qarastyrylǵan, 11,5 myń jumys orny qurylady dep kútilýde. Ázirge joba boıynsha Aqmola, Almaty, Atyraý, Shyǵys Qazaqstan, Qaraǵandy jáne Qyzylorda oblystary boıynsha 11 tirek aýyldyq eldi meken belgilengen.