Aýyldaǵy volonterlik uıymdarǵa 1 mln teńgelik granttar beriledi

ASTANA. QazAqparat – Aýyldaǵy volonterlik uıymdarǵa 1 mln teńgelik granttar beriledi. Astanadaǵy beıbitshilik jáne kelisim saraıynda ótip jatqan Halyqaralyq volonterler forýmynyń kýlýarynda Aqparat jáne qoǵamdyq damý vıtse-mınıstri Danııar Qadirov osyndaı málimet aıtty, dep habarlaıdy QazAqparat tilshisi.

«Byltyr 4 shildede Memleket basshysy Qasym-Jomart Toqaev «Volonterlik qyzmet týraly» Zańǵa qol qoıdy. Ol zańda volonterlik qyzmettiń jumysyna qolaıly jaǵdaı jasaý sharalary qarastyrylǵan. Eriktilerdiń oqýǵa, jumysqa túsýi kezinde basymdyqtar bolady. Sonymen birge, qazir volonterlik uıymdarǵa negizinen jınalǵan júkti saqtaıtyn qoımalar kerek. Sol qoımalardy jergilikti organdar tómen baǵamen nemese tegin beretindeı zańdy tetikter kózdelgen», - dedi vıtse-mınıstr.

Onyń sózinshe, 2023 jyly volonterlik uıymdardy qoldaý úshin 54 joba qolǵa alynǵan.

«Sonyń ishinde 250 shaǵyn grant beriledi. Ár granttyń somasy 1 mıllıon teńgedeı bolady. Eki jylǵa deıingi merzimmen beriledi. Ol granttardyń kóbi aýyldy jerde volonterlik uıymdardy qoldaýǵa baǵyttalyp jatyr», - dedi Danııar Qadirov.