Aýyldaǵy sýpermarket - baspasózge sholý
ASTANA. QazAqparat - «QazAqparat» halyqaralyq aqparattyq agenttigi 26 shilde, seısenbi kúni jaryq kórgen respýblıkalyq buqaralyq aqparat quraldaryndaǵy ózekti maqalalarǵa sholýdy usynady.
***
«Egemen Qazaqstan» gazeti búgin shalǵaı aýyldaǵy sýpermarket týraly jazyp otyr. Aýyldyń dúkeni degende kóz aldymyzǵa elesteıtini bir bólmege úıilgen taýar. Tazalyǵyn bylaı qoıǵanda, tar bolǵandyqtan ishinde aınalyp júretin jer joq. Attap bassań bir zatqa shalynasyń. «Al, jaqynda Jýaly aýdanynyń eń shalǵaıda jatqan Qoshqar ata aýylyna barǵanda mańdaıynda «sýpermarket» degen jazýy bar dúkendi kórip, ań-tań bolǵanymyz ras. Oıbaı-aý, Qoshqar ata degenińiz oblystyń shetinde, jeldiń ótinde jatqan aýyl emes pe? Qys túse qoshqaratalyqtar ortalyqpen qosh aıtysyp, jol qatynasy tipten qıyndap, kún jylynǵansha tereń saıda tym-tyrys jatyp alady. Endeshe syrtpen baılanysy az osyndaı shaǵyn aýyldan sýpermarket ashý qanshalyqty tıimdi? Aty bar da, zaty joq saýda orny bolar degen kúdikpen álgi dúkenniń esigin ashtyq. Joq, alys aýyldaǵy myna sýpermarkettiń qaladaǵy saýda oryndarynan bir mysqal da kem emes eken. Іshi keń ári sándi, sosyn taýarǵa da óte baı. Tipti, aýyldyqtar úshin jat kórinetin temir arbalar da tur. Biz bas suqqan on-on bes mınýttyń ishinde tórt-bes tutynýshy saýda jasap ketti» dep jazaly gazet tilshisi. Bul týraly tolyǵyraq basylymnyń búgingi sanyndaǵy «Aýyldaǵy sýpermarket» atty maqaladan oqı alasyzdar.
Jaqynda álemge áıgili Forbes jýrnalynyń reseılik bólimshesi Almaty túbindegi Shymbulaq shańǵy kýrortynyń álemdegi eń tańdaýly top-ondyqty bastap turǵandardyń biri ekenin atap kórsetipti. Bul týraly «Egemen Qazaqstan» gazeti jazyp otyr. «Shańǵy kýrorttarynyń reıtıngilerin anyqtaýdy RoomGuru.ru ınternat-portalymen birge júrgizgen Forbes mamandary olardy birneshe qyrynan alyp qarastyrǵan eken. Buǵan kýrorttyń ornalasqan aýmaǵy, tabıǵatynyń janǵa jaılylyǵy, aýasynyń tazalyǵy, onda demalý quny men jasalatyn servıstik qyzmeti túgel kiredi. Bir qyzyǵy, jahan jurty búginde qysy-jazy japa-tarmaǵaı baryp demalyp jatatyn Alpidegi Kýrshevel bul ondyqtyń tiziminde joq. Al Almatynyń Shymbulaǵy top toǵysynda ekinshi bolyp tur» dep habarlaıdy basylym. Bul týraly tolyǵyraq «Shymbulaqtyń Kýrshevelden nesi kem?» atty maqaladan oqı alasyzdar.
***
«Aıqyn» gazetiniń habarlaýynsha, «Nur Otan» partııasynyń Almaty qalasy Jetisý aýdandyq fılıaly aqparattyq-nasıhattaý toby «Sálem» bazary qyzmetkelermen kezdesti. «Kezdesýdiń basty taqyryby jer máselesi boldy. Aqparattyq-nasıhattaý toby múshesi Qaırat Terimbetov, «Nur Otan» partııasynyń Jetisý aýdandyq fılıalynyń keńesshisi Mádı Túlebaev, «Sálem» saýda ortalyǵynyń dırektory Baqytjan Mámetov QR Jer Kodeksindegi ózgerister men qosymshalar, sondaı-aq Jer komıssııasynyń jumysy jaıly pikir bólisti» dep habarlaıdy «Aıqyn» aqparat. Bul týraly tolyǵyraq «Aıqyn» gazetindegi «Jer máselesi jiti nazarda» atty maqaladan oqı alasyzdar.
***
«Ekspress K» basylymynyń jazýynsha, jazǵy demalys kezinde kádimgideı demalý úshin múlde úndemeý praktıkasyn isk qosý kerek. Mysaly, «Qazaqstandaǵy ómir óneri» atty mekteptiń muǵalimi Tatıana Novıkovanyń aıtýynsha, ol bes kún sóılemeı júrgen. Keıin baıqaǵandaı, bul tásil mıdy tolyq tazartyp shyǵady eken.
«Buldinı emes,rýhanı tájirıbe. Bul únemi sharshap júretin qala turǵyndaryna kerek tásil. Qanshalyqty kóp kún úndemeı júrseń, sonshalyqty mı tazaryp, adam óz ózin tyńdaı bastaıdy. Kóp sóılep, qanshama kúshimizdi joǵaltyp jatqanymdy aıtpaı-aq qoıaıyn», - degen ol Ekspress K basylymyna bergen suhbatynda. Bul týraly tolyǵyraq «Kak obnýlıt mozg» atty maqaladan oqı alasyzdar.
