Aýyldaǵy ómirdi jaqsartýdy kózdeıtin konkýrstyń 60 jeńimpazy ıdeıasyn júzege asyra bastady
Bastamalardyń bári utyp alynǵan grant qarajaty esebinen iske asyrylady.
QR Qoǵamdyq damý jáne mınıstrliginiń tapsyrysy boıynsha shaǵyn granttar konkýrsy aýylda turatyn halyqtyń búgingi tańda nege muqtaj ekenin kórsetken. Máselen, aýyldy jerlerdegi ómirdi jaqsartqysy keletin osy konkýrstyń 60 jeńimpazy 500 000 teńgeden alyp, ıdeıasyn júzege asyryp jatyr. Ol úshin olar «Azamattyq bastamalardy qoldaý ortalyǵy» KEAQ uıymdastyratyn jeke vebınarlarda oqydy.
«Aýyldaǵy azamattyq bastamalardy damytýǵa baǵyttalǵan is-sharalar keshenin uıymdastyrý» jobasynyń úılestirýshisi Saltanat Kenjebekovanyń aıtýynsha, bul eldegi óńirlerdiń bárin qamtıdy. Ol óziniń týǵan jerin gúldendirýge úles qosýǵa nıetti azamattardyń sany óte kóp ekenin aıtady.
«433 ótinimniń ishinde konkýrstyń erejesine sáıkes keletin 254-i tańdalyp alyndy. Ótinimniń basym kópshiligi Aqtóbe (57) oblysynan tústi. Odan keıingi oryndarda Qyzylorda (39), Almaty (28), Shyǵys Qazaqstan (26) oblystary tur. Osydan keıin sarapshylar komıssııasy 60 jeńimpaz aıqyndaldy. Olardyń kóbi – aýyl turǵyndaryna qajetti ázirlemeler. Belsendilerdiń ózderiniń kishi otanyna úles qosqysy keletinderi qýantady», - deıdi joba úılestirýshisi.
Máselen, Aqtóbe oblysy Alǵa aýdanynan bastamashyl toptyń kóshbasshysy Rozalııa Ibragımova «Karamelka» atty balalar dámhanasyn ashpaq.
Alǵan aqshasyna zeınetker syrǵanaq, altybaqan, batýttardy alyp, anımatorlardy shaqyrmaq.
«Balalar men jasóspirimderdiń oınaıtyn, týǵan kúnderin atap ótetin jeri joq. Sondyqtan qyzymmen jáne nemeremmen birge bizdiń «Lakomka» otbasylyq dámhanasynyń janynda kishkentaı kelýshilerge bólme jabdyqtaýdy sheshtik», - deıdi ekinshi toptaǵy múgedektigi bar áıel.
Dál osy oblystyń Baıǵanın aýdanynan Arjaq Orynbasarova óziniń kishi otanynda ekotýrızmdi damytýdy kózdep otyr. Osylaısha, ol Baıǵanın aýdanynyń birneshe aýylyn qamtymaq.
«Bizde qonaqtarǵa kórsetýge bolatyn kórnekti oryndarymyz jeterlik,. Máselen, Aqtolaǵaı taýy men Aqqumnyń ózi qandaı keremet», - deıdi boıjetken.
Grant qarajaty arqyly ol belsendiler tobymen birge palatka, jınalatyn ústel, oryndyq, proektor men basqa da qajetti quraldardy satyp almaq.
Al Muǵaljar aýdanynyń tájirıbeli eriktileriniń biri Álisher Berdibaev «Vavý park» jobasyn usynyp, konkýrsta jeńiske jetti. Bul ıdeıany ol Qaıyńdy aýyldyq okrýginde iske asyra bastady. Aıtýynsha, jerlesteriniń 90 paıyzdan astamy balalardyń bos ýaqytyn uıymdastyrýdy armandaıdy. Batýt, sabyn kópirshigi generatory, balmuzdaq pen sýsyndary bar «Vavý park» bir ýaqytta 200-ge jýyq balany qabyldaı alady.
Túrkistan oblysy Saıram aýdany Aqsýkent aýylynyń belsendileri ıogaǵa muqtaj júzden astam qart áıeldi tartpaq. Sondaı-aq Qaraǵandy oblysy Shet aýdany Kenshoqy aýylynyń turǵyny Ashat Amangeldiuly qarapaıym jobany júzege asyrýdy usynyp otyr. Onyń paıymdaýynsha, tuqymy taza janýarlardy saqtap, kóbeıtý úshin tazy tuqymdy ıtterge arnalǵan alǵashqy panalaý ornyn qurýdyń ýaqyty kelgen. Almaty oblysy Eńbekshiqazaq aýdany Báıterek aýylynda ekologııa máseleleri kóterilip jatyr. Erjan Ájimoldaev tabıǵatty qoqystan tazartyp qana qoımaı, adamdardy únemdilikke úıretý úshin qaldyqtarǵa ekinshi ómir syılaýdy uıǵarǵan.
«Bul ótinim berilgen jobalardyń az ǵana bóligi. Tipti osylardyń ózimen aýyldaǵy bastamalardyń ártúrliligi men ózektiligin baǵalaýǵa bolady. Belsendi azamattyq ustanymy bar adamdar jerlesterine ne qajet ekenin kórip, ıdeıalaryn qoǵamǵa engizýge daıyn. Jobalardy iske asyrý úshin «Azamattyq bastamalardy qoldaý ortalyǵy» KEAQ granttary kóptegen aýyl turǵyndarynyń ómirin naqty ózgertedi. Sonymen qatar, jyl saıyn olardyń sany edáýir artady. Eger 2020 jyly aýylda azamattyq bastamalardy damytýǵa 10 grant bólinse, bıyl shaǵyn granttardy 60 ÚEU jeńip aldy», - dep atap ótti «Azamattyq bastamalardy qoldaý ortalyǵy» KEAQ Basqarma tóraǵasy Lıma Dıas.
Ortalyqtan atap ótkendeı, azamattyq bastamalardy qoldaý úshin granttyq qarjylandyrý ary qaraı jalǵasyn tabady.
