Aýyldaǵy muǵalimderdiń jalaqy alý júıesin ózgertý usynyldy
NUR-SULTAN. QazAqparat - Qazaqstanda aýyldarda muǵalimderdiń jalaqy alý júıesin ózgertý usynyldy. Bul týraly QR Bilim jáne ǵylym mınıstri Ashat Aımaǵambetov aıtyp berdi, dep habarlaıdy QazAqparat tilshisi.
«Aýyl men qala arasyndaǵy alshaqtyqty azaıtý máselesi únemi nazarda. PISA reıtıngi arqyly tek aýyl men qala emes, óńir men óńir arasyndaǵy úlken alshaqtyqty kórip otyrmyz. Bul, árıne, keshendi shara qabyldaýdy qajet etedi. Aýyl men qalanyń qashyqtyǵyn aıtqanda, eń aldymen muǵalim tapshylyǵy máselesi kórinedi. Sondyqtan, Memleket basshysy tıisti tapsyrma berip, aýylda isteıtin muǵalimderdiń jalaqy alý júıesin ózgertýdi usyndy. Bul nege mańyzdy? Óıtkeni, bilim salasynda bir stavka - 18 saǵat. Al shaǵyn jınaqtalǵan mektepterde 18 saǵat bolmaıdy, bir synyp ekinshi synyppen qosylyp oqıdy nemese bala sany az. Sondyqtan da, 4-6 saǵat úshin muǵalim aýylǵa barmaıdy. Muǵalim bolmaǵasyn, bilim sapasy da bolmaıdy», - dep túsindirdi mınıstr Feısbýk jelisinde halyq aldynda esep berý barysynda.
Mınıstrdiń aıtýynsha, aýyl men qala arasyndaǵy alshaqtyqty joıý úshin basqa sharalar qoldanylady. Sonyń ishinde birneshe jaqyn pánniń muǵalimderin daıarlaý, eńbekaqy júıesin ózgertý, oqý-materıaldyq bazany nyǵaıtý, sapaly ınternetpen qamtamasyz etý sharalary qolǵa alynyp jatyr.
