Aýyldaǵy memqyzmetshini áleýmettik qorǵaý qalaı kúsheıtiledi
NUR-SULTAN. QazAqparat - Internet-konferentsııa barysynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasynyń orynbasary Aıgúl Shaıymova aýyldaǵy memqyzmetshilerdiń áleýmettik qorǵalýyn kóterý baǵytyndaǵy sharalar týraly aıtty, dep habarlaıdy QazAqparat tilshisi.
Atap aıtqanda, «Ashyq dıalog» portalynda naqty ýaqyt rejimindegi ınternet-konferentsııada aýylda turatyn memlekettik qyzmetshilerdiń áleýmettik qorǵalýyn arttyrý boıynsha qandaı sharalar qabyldanatyndyǵy suraldy.
Óz kezeginde Aıgúl Shaıymova agenttik turaqty negizde memqyzmetshilerdiń áleýmettik qorǵalýyn arttyrý jónindegi jumystardy atqaryp jatqandyǵyn sóz etti.
«Aýyldaǵy kadrlardyń tapshylyǵyn eskere otyryp, osyǵan deıin «Dıplommen aýylǵa» baǵdarlamasynyń memqyzmetshilerge de taralýyn pysyqtadyq. Tıisti túzetýlerdi biz zań jobasyna engizdik. Qazirgi kezde ol Parlament Májilisiniń qaraýynda», - dedi A. Shaıymova.
