Aýyldaǵy medıtsınalyq ınfraqurylym 50% tozǵan

ASTANA. QazAqparat – Aýyldaǵy medıtsınalyq ınfraqurylym shamamen 50%-ǵa tozǵan. Bul týraly QR Densaýlyq saqtaý mınıstri A. Ǵınııat aıtyp berdi, dep habarlaıdy QazAqparat tilshisi.

«Memleket basshysynyń tapsyrmasymen aýyldaǵy obektilerge ınventarızatsııa júrgizildi, nátıjesinde 200-den astam eldimekende medıtsınalyq obektiler joq, 400-ge jýyq medıtsınalyq obekti jaldamaly, apatty nemese beıimdelgen ǵımarattarda ornalasqan», - dedi mınıstr Úkimettiń búgingi otyrysynda.

A. Ǵınııattyń aıtýynsha, aýyldaǵy medıtsınalyq-sanıtarııalyq alǵashqy kómektiń medıtsınalyq ınfraqurylym 50%-ǵa tozǵan.

Sonymen birge, el halqyna, onyń ishinde aýyl turǵyndaryna medıtsınalyq-sanıtarııalyq alǵashqy kómektiń qoljetimdiligin arttyrý úshin bıyl densaýlyq saqtaý uıymdary jelisiniń jańa memlekettik normatıvi bekitildi.

Osylaısha, 50 adamǵa deıingi aýyldarda meıirger medıtsınalyq kómekti úı-jaısyz júzege asyrady, al 500 adam turatyn aýyldarda medıtsına qyzmetkerleriniń sany bir adamnan úshke deıin ulǵaıyp, feldsherlik-akýsherlik pýnktter ashýǵa bolady.

«Ambýlatorııalyq dári-dármekpen qamtamasyz etýge kirmeıtin dárilerdiń qoljetimdi etý úshin salalyq zańnamaǵa aýyldyq medıtsınalyq uıymdarda dárihana pýnktterin qurý jónindegi norma engizildi. Bıylǵy shilde aıynan bastap 230 eldimekende 75 memlekettik jáne 161 jeke dárihana ashyldy», - dedi Ajar Ǵınııat.

Buǵan deıin Densaýlyq saqtaý mınıstri aýyl turǵyndarynda jıi kezdesetin aýrýlardy ataǵan edi.