Aýyldaǵy mádenıet úılerinen qara qulyp kórdim – Azamat Satybaldy

TÚRKІSTAN. QazAqparat – Búgin Ulttyq quryltaı qarsańynda jumys sektsııalarynyń otyrysy ótti. Jıynǵa qatysqan T.Júrgenov atyndaǵy Qazaq ulttyq óner akademııasynyń rektory, Qazaqstannyń eńbek sińirgen qaıratkeri Azamat Satybaldy mádenıet salasyn kóterý kerek ekenin aıtty, dep habarlaıdy QazAqparat tilshisi.

«Ǵalam jahandyq mádenıet salasynda, sonyń negizinde ómir súrip jatyr. Biz álige deıin aýyldyq, aýdandyq, qalalyq mádenıet dep bólinemiz. Munyń arajigi bolmaý kerek. Barlyǵymyz jalpy ulttyq jahandyq mádenıetke uıysýymyz qajet. Qazir aýyl men qalanyń arasyndaǵy aıyrmany alyp tastaıtyn ýaqyt keldi. Sebebi barlyǵy qoljetimdi», – dedi ol.

Sondaı-aq Azamat Satybaldy aýyldaǵy mádenıet úıleri tek qaǵaz júzinde jumys isteıtinin jetkizdi. Sol sebepti, ol Ulttyq quryltaı jıyndarynda aýyldardaǵy mádenıet úıleriniń sanyn arttyryp, sapasyn kóterý kerektigin aıtyp júrgenin jetkizdi.

«Kópke topyraq shashpaımyn. Kóptegen jerge baryp júrmin. Men Mádenıet úıleri jumys istep turǵan aýyl kórgen joqpyn. Barlyǵynda qara qulyp turady. Al qaǵaz júzinde keremet jobalar jasalyp, úıirmeler istep tur. Іs júzinde aýyl, aýdan ákiminiń jınalys ótkizetin orny. Bul bolmaıdy. Aýyldaǵy mádenıet úılerin jandandyrýymyz kerek. Aýdandaǵy mádenıet úılerinde kınoteatrlar men qýyrshaq teatrlary bolýy kerek. Mádenı oshaqtardyń sanyn kóbeıtip, sapasyn arttyrýymyz qajet», – dedi ol.

Sondaı-aq, Túrkistan topyraǵynda ótken quryltaıda eldiń órkendeýi jolyndaǵy mańyzdy sheshimder qabyldanatynyna senim bildirdi.

«Biz jyl boıy kishkene toptarǵa bólinip, bir jylǵy problemalardy kóterip, usynystar jasadyq. Erteń Prezıdent birazynyń sheshimin aıtady degen oıdamyz. Quryltaıdyń Túrkistanda ótýi úlken mártebeli uǵym dep túsinemin. Kıeli jerde eldiń bolashaǵy, eldiń órkendeýi úshin shynaıy bir sheshimder qabyldanyp, tyń dúnıeler aıtylyp jatsa, quba-qup», – dedi ol.