Aýyldaǵy mádenıet úıi 30 jyldan keıin jóndelip jatyr - Semeı
SEMEI. QazAqparat - Semeı mańyndaǵy Qaınar aýylyndaǵy 30 jyl jóndelmegen mádenıet úıinde qurylys jumystary júrip jatyr. Bul týraly QazAqparat tilshisi Semeı qalasy ákiminiń baspasóz qyzmetine silteme jasap habarlaıdy.
Júrgizilip jatqan jumys barysymen qala ákimi Ermak Sálimov tanysty. 1986 jyly paıdalanýǵa berilgen ǵımaratta mádenıet úıi, ortalyqtandyrylǵan kitaphana júıesi, mýzyka mektebi ornalasqan.
«Eki qabatty ǵımarattyń tóbesindegi shatyrdy tolyqtaı aýystyrý úshin 2017 jyly 5 mıllıon 900 myń teńge, órt oqıǵalarynyń aldyn alý úshin dabyl qondyrǵysyn ornatýǵa 2 mıllıon 800 myń teńge bólindi. Al 2018 jyly ǵımarattyń ishki jumystaryna, elektr jelilerin aýystyrýǵa, 300 adamǵa arnalǵan sahnany jańartýǵa, basqa da jóndeý jumystaryna 18 mıllıon teńge jáne 506 myń teńge beınekameralar ornatý úshin bólingen bolatyn. Búgingi kúni jumystar qyzý júrip jatyr»,- ákimdik delingen baspasóz qyzmeti taratqan habarlamada.
Mádenıet úıiniń dırektory Qudaıbergen Turysbekov qala basshysyna jóndeý jumystarynyń barysymen tanystyryp, barlyq jumystar keste boıynsha sapaly júrip jatqanyn aıtty.
Aıta ketsek, aýyl Mádenıet úıinde 12 úıirme, «Qaınar» halyqtyq teatry, «Qaınar» án-bı ansambli jáne jastarǵa arnalǵan «Meızek» shyǵarmashylyq ortalyǵy jumys isteıdi. Qajetti barlyq mýzykalyq apparatýramen, sahnalyq kıimdermen, mýzykalyq aspaptarmen jabdyqtalǵan. Barlyǵy 20 adamdy jumyspen qamtyp otyr.
