Aýyldaǵy kúrdeli jóndeýden ótken medıtsınalyq mekemede 483 naýqas em alýda - Aqmola oblysy
KÓKShETAÝ. QazAqparat - Aqmola oblysynyń Bulandy aýdanyndaǵy medıtsınalyq áleýmettik mekemesi kúrdeli jóndeýden ótti. Bul týraly aımaq basshysy Sergeı Kýlagınniń aýdanǵa jumys sapary barysynda aıtyldy, dep habarlaıdy «QazAqparat» tilshisi.
Kýpchanovka eldi mekenindegi medıtsınalyq áleýmettik mekemede búgingi kúni 483 naýqas em alýda. Ótken jyly munda jalpy quny 308 mıllıon teńgeniń kúrdeli jáne 58,2 mıllıon teńgege aǵymdaǵy jóndeý jumystary júrgizildi. Mekemede bolǵan oblys ákimi ǵımarattyń ishin aralap kórip, dárigerler ujymymen kezdesti. Ortalyq dırektory Talǵat Súleımenovtiń aıtýyna qaraǵanda, munda naýqastardyń osynda turyp, emdelýine barlyq jaǵdaı jasalǵan. Mekemede 250-ge jýyq medıtsınalyq qyzmetker jumys isteıdi.
«Táýelsizdik alǵan jyldardan beri bul ǵımaratta alǵashqy ret kúrdeli jóndeý jumystary júrgizildi. Memleket basshysynyń tapsyrmasyna sáıkes múmkindigi shekteýli jandardyń áleýmettik beıimdelýi úshin barlyq jaǵdaı jasalynýda. Endi ashyq ta, jaıly bólmeler qamqorlyqqa alynǵandardyń psıhologııalyq jaǵdaıyn jaqsartýǵa az da bolsa septigin tıgizedi dep senemin», - dedi S.Kýlagın óz sózinde.
Ortalyqta psıhologııalyq, eńbek terapııasy, LFK, stomotologııa kabınetteri, saltanat zaly, kitaphana, zerthana jumys isteıdi. Aldaǵy ýaqytta oblystaǵy ózge medıtsınalyq áleýmettik mekemelerde de kúrdeli jóndeý jumystaryn qolǵa alý kózdelgen.
