Aýyldaǵy ınfraqurylymdy damytý mańyzdy- senator
«Elbasynyń jaqynda ótken sezde áleýmettik salany damytýǵa, kóp balaly analardy qoldaýǵa, aýyldyń ınfraqurylymyn jaqsartýǵa arnalǵan aýqymdy baǵdarlamalyq doktrınamen tanystyrdy. Jalpy baǵdarlamaǵa baılanysty aıtar bolsaq, aýyldy damytý degen úlken másele ekeni anyq. Sondyqtan Aýyl partııasynyń tóraǵasy retinde «Nur Otan» partııasynyń sezindegi qabyldanǵan bastamalardyń bári bizdiń de oıymyzdan shyqqanyn aıtqym keledi. Sebebi, onyń bári halyqtyń turmys-tirshiligine tikeleı qatysty, eldiń ál-aýqatyn arttyrýǵa, áleýmettik jaǵdaıyn jaqsartýǵa arnalǵan máseleler», - deıdi Álı Bektaev.
Biz úshin eń bastysy - aýyldardy saqtap qalý. Qazirgi ýaqytta 7 myńnan astam aýyldy bólip alyp, solarǵa ınfraqurylymdyq jaǵdaı jasaı otyryp, aýyldaǵy azamattardy turaqtandyrý óte mańyzdy ekeni daýsyz. Halyqtyń barlyǵy qalaǵa kóshe bermeı, aýylda turaqtansa - nur ústine nur.
Senatordyń aıtýynsha, jastardy jumyspen qamtamasyz etý máselesi mańyzdy.
«Aýyldy biz ekonomıkanyń negizgi draıverine aınalady dep otyrmyz. Sebebi aýyl sharýashylyǵy ónimderiniń 29 paıyzy ǵana búgingi tańda qaıta óńdeledi. Sol aýylsharýashylyǵy ónimderin qaıta óńdeý kásiporyndaryn qurýǵa qyrýar ýaqyt, qomaqty qarajat qajet, aýqymdy jumys jasalýy qajet. Eger sol kásiporyndar jumysqa kirisetin bolsa, kóptegen jumys oryndary ashylady. Odan bólek, aýyl mektepteriniń, densaýlyq saqtaý mekemeleriniń jaǵdaıyn jaqsartý da zor mańyzǵa ıe bolyp otyr. Osy máselelerge basa nazar aýdarylyp, jumys naqty jasalatyn bolsa, aýyldan el kóshpeıdi», - deıdi senator.