Aýyldaǵy densaýlyq júıesin qarjylandyrýǵa 3 jylda qansha qarjy bólindi
ASTANA. QazAqparat - Búgin Parlament Májilisindegi Úkimet saǵatynda QR Densaýlyq saqtaý mınıstri Ajar Ǵınııat mindetti áleýmettik medıtsınalyq saqtandyrý júıesinen tys qalyp otyrǵan adamdar týraly aıtty, dep habarlaıdy QazAqparat tilshisi.
«3 jyldyń ishinde aýyldaǵy densaýlyq saqtaý salasyn qarjylandyrý 2 trln 231 mlrd teńgeni qurady. 2023-2025 jyldarǵa shamamen 2 trln 646 mlrd teńge qarajat kózdelgen. 2022 jylǵy 1 qyrkúıektegi jaǵdaı boıynsha mindetti áleýmettik medıtsınalyq saqtandyrý júıesinde aýylda shamamen 6 mln adam tirkelgen, osy kórsetkish 79 paıyzyn qurady. Bul rette, 1,5 mln adam áli kúnge deıin mindetti áleýmettik medıtsınalyq saqtandyrý júıesinen tys qalyp otyr», - dedi A. Ǵınııat aýyldaǵy densaýlyq saqtaý máselesin talqalýǵa arnalǵan Úkimet saǵatynda.
Onyń aıtýynsha, mindetti áleýmettik medıtsınalyq saqtandyrýdy iske asyrýdyń arqasynda medıtsınalyq qyzmetterdi qarjylandyrý 2,1 ese ósti. Onyń ishinde:
- profılaktıkalyq medıtsınalyq qarap-tekserýler – 2 ese;
- konsýltatsııalyq-dıagnostıkalyq qyzmetter – 1,5 ese;
- statsıonarlyq kómek – 1,2 ese;
- joǵary tehnologııalyq medıtsınalyq qyzmetter – 2,2 ese;
- medıtsınalyq ońaltý 1,5 ese ulǵaıdy.
«Sonymen qatar, qymbat KT, MRT jáne PET zertteýleriniń ósýi baıqaldy», - dedi mınıstr.
