Aýyldaǵy árbir besinshi áıel zorlyq-zombylyqty qalypty nárse sanaıdy
NUR-SULTAN. QazAqparat - «Qazaqstannyń isker áıelder qaýymdastyǵy» respýblıkalyq qoǵamdyq birlestiginiń prezıdenti, QR Prezıdenti janyndaǵy Áıelder isi jáne otbasy-demografııalyq saıasat ulttyq komıssııasynyń múshesi Raýshan Sársembaeva qazaqstandyq áıelderdiń zorlyq-zombylyqqa kózqarasy týraly zertteý nátıjesin aıtty, dep habarlaıdy QazAqparat.
«Biz zorlyq-zombylyqsyz Qazaqstan» aktsııasyn qoldaımyz. Bul jóninde birqatar sharalar atqardyq. Búginde Qazaqstanda 9,7 mln áıel turady, bul - halyqtyń 52%. Olar ultymyzdyń ál-aýqatyna eleýli úles qosyp keledi. Sonymen birge, áıelderdiń ómirine tónetin syn-qaterler kóp. BUU derekterine sáıkes, 2018 jyly árbir úshinshi qylmys áıelderge qarsy jasalǵan», - dedi Raýshan Sársembaeva Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, qazaqstandyq áıelderdiń 15% kúıeýi áıelin urýǵa quqyly dep sanaıdy. Al aýyldaǵy árbir besinshi áıel zorlyq-zombylyqty qalypty jaǵdaı dep esepteıdi.
«Elimizdegi áıelderdiń bul jaǵdaıy azamattyq qoǵamdy qatty alańdatady. Osyǵan baılanysty áıelderdiń quqyqtary men múmkindikterin keńeıtý úshin iri áıelder uıymdary birigip, qyrkúıek aıynda Qazaqstannyń áıel kúshteri alıansyn qurdy. Onda áıelderdiń múmkindikterin arttyratyn naqty maqsattar qoıyldy. Eń aldymen, olarǵa tıisýdiń jolyn kesý, harassmentpen kúres jáne turmystyq zorlyq-zombylyq qylmysynyń jazasyn kúsheıtý kerek», - dedi R. Sársembaeva.
