Aýylda jańa mádenıet úıi paıdalanýǵa berildi - Atyraý oblysy
ATYRAÝ. QazAqparat -Atyraý aýyldyq okrýgine qarasty Jańatalap aýylynda tuńǵysh Prezıdent kúnine oraı jańa mádenıet úıiniń ashylý saltanaty ótti, dep habarlaıdy QazAqparat qalalyq ákimdiktiń baspasóz qyzmetine silteme jasap.
Atyraýda Tuńǵysh Prezıdent kúnin toılaý Jańatalap aýylyndaǵy 200 oryndyq mádenıet úıin paıdalanýǵa berýden bastaldy. Nysan áleýmettik-ınfraqurylymdyq jobalardy júzege asyrý aıasynda salynǵan.
Jańa ǵımaratta ákimshilik-tehnıkalyq oryndar, úlken aýdıtorııa, kórermen zaly, grım bólmesi, ártister bólmesi, kitaphana men kassa bar. Ekinshi qabatta keńseler men kórkemdik jáne úıirmelerge arnalǵan sheberhanalar ornalasqan.
Atyraý qalasy ákiminiń orynbasary Polymbet Hasanovtyń aıtýynsha, jańa mádenıet úıi Atyraý aýyldyq okrýgi úshin óte qajet boldy, sebebi jergilikti mádenı is-sharalardy ótkizetin oryn joq.
«Turǵyndar bul kúndi kópten kútti jáne barshamyzdyń qýanyshymyzǵa oraı bul kún týdy. 200 oryndyq jańa mádenıet úıi Elbasynyń «Rýhanı Jańǵyrý» maqalasy aıasynda salyndy. Osy oraıda oblystaǵy birqatar áleýmettik jobalarǵa qoldaý kórsetip júrgen, nysan qurylysyn salýǵa demeýshilik kórsetken «NCOC» kompanııasyna alǵysymyzdy bildiremiz. Aldaǵy ýaqytta da seriktestigimiz jalǵasady dep senemiz»,-deıdi Polymbet Hasanov.
Aıta keteıik, 4000-nan asa turǵyny bar Atyraý aýyldyq okrýginde buǵan deıin birde-bir mádenıet úıi bolmaǵan. Bıylǵy jyly okrýgte qos mádenıet úıi paıdalanýǵa berildi.
