Aýylda sapaly medıtsınalyq qyzmetke qoljetimdilik qamtylmaı otyr - D.Nazarbaeva

ASTANA. QazAqparat - Aýylda sapaly medıtsınalyq qyzmetke qoljetimdilik áli qamtylmaı otyr. Bul týraly búgin Parlament Májilisindegi Úkimet saǵatynda depýtat Darıǵa Nazarbaeva málimdedi. Jıynda «Salamatty Qazaqstan» baǵdarlamasynyń oryndalý barysy talqylanǵan bolatyn.

«Halyqqa aýrýhanalar men emhanalardyń qoljetimdiligi qamtylmaı otyr. «100 mektep» pen «100 aýrýhana» baǵdarlamasy boıynsha 71 nysan salyndy, onyń 25-i ǵana aýylda. Qalǵan nysandardy 2016 jyly aıaqtaý josparlanǵan. Degenmen, qalǵan 13 nysannyń qurylysy áli bastalmaǵan. Bunyń ózi adamdardyń sapaly medıtsınalyq qyzmetke qoljetimdiligi máselesiniń, ásirese, aýyldyq jerlerde áli sheshimin tappaı otyrǵanyn kórsetedi. Kóptegen aýyldar aýdan ortalyqtarynan qashyqta ornalasqan. Endeshe, aýa raıynyń qolaısyzdyǵy jaǵdaılaryn, bizdiń joldarymyzdyń jaı-kúıin esepke alsaq, shuǵyl medıtsınalyq kómekti qajetsinetin kúıge tap bolǵan adamnyń jaı-kúıin kózge elestetýdiń ózi qıyn», - deıdi D.Nazarbaeva.

Osyǵan oraı, depýtat mınıstrlikte josparlaý jumysy syn kótermeıtinin, keıbir nysandardy salý barysynda olardyń aýdan men aýyl arasyndaǵy qoljetimdilikti sheshýdi kózdemegenin alǵa tartty. «Bir óńirdegi jurtshylyq emdeý mekemeleriniń tapshylyǵynan japa shegip jatsa, ekinshi bir óńirlerde olar durys jumys istep turǵan da joq, qondyrǵylarmen de tolyq qamtamasyz etilmegen», - deıdi halyq qalaýlysy.