Aýylda otyryp kásibin dóńgeletemin degenderge kedergi joq - Bektas Beknazarov
QOSTANAI. QazAqparat - Qostanaı oblysynda jumys saparymen júrgen QR Parlamenti Senaty Tóraǵasynyń orynbasary Bektas Beknazarov jáne senatorlar Serik Bekturǵanov pen Jeńis Nurǵalıev jýrnalıstermen kezdesti, dep habarlaıdy QazAqparat tilshisi.
Senat tóraǵasynyń orynbasary bes áleýmettik bastamanyń utymdy tustaryn, ásirese, aýyl turǵyndary úshin jańa múmkindik beretin baǵyttaryna toqtaldy. Onyń sózinshe, ortalyqtan shalǵaı ornalasqan mekenderdiń turǵyndary shaǵyn kásip ashýǵa zor múmkindik aldy.
«Elbasy 2018 jyly jeńildetilgen shaǵyn nesıe qarjysyna qosymsha 20 mıllıard teńge bólýdi tapsyrdy. El halqynyń 40 paıyzǵa jýyǵy aýyldarda turatynyn bilemiz. Sol sebepti memleket jeńildetilgen shaǵyn nesıe berý qarjysyn ulǵaıtyp, aýyldaǵy aǵaıyndarǵa neǵurlym tıimdi tetik taýyp berdi. Buryn bizge dál qazirgideı múmkindikter jasalmady. Endi, tipti, aýylda otyryp kásip dóńgeletemin degenderge kedergi joq. Tek bar ynta-jigermen ózińe, memleketińe paıda tıgizýdi oılasań bolǵany», - dedi senator.
Shaǵyn kásip ashýdyń talaptary burynǵysha qaldy. Bul týraly agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy Jeńis Nurǵalıev aıtyp berdi.
«Úkimet buǵan deıin de kásipkerlikti damytý maqsatynda turǵyndarǵa shaǵyn nesıe berýdiń túrli úlgilerin sátti iske asyryp keldi. Bir ǵana «Bastaý bıznes» jobasyn alaıyq. Ol óz bıznesin jańadan ashqysy kelgenderge serpin beredi. Shaǵyn nesıe berýdi kóbeıtý bastamasynyń artyqshylyǵy qarjy kóleminiń 62 mlrd teńgege deıin jetýinde. Óz kezeginde ol ıgerilý deńgeıine qaraı jyl saıyn ósip, eki eselenedi. Al nesıe berý sharttary ózgerissiz qalady. Tek tolyqtyrýlar engizilýi múmkin», - dedi Jeńis Nurǵalıev.
Bektas Beknazarov baspana alýdyń jańa múmkindikteri týraly da suraqtarǵa jaýap berdi.
«Elbasynyń bastamasynyń birinshi baǵyty boıynsha jasalatyn jumystar qurylys naryǵyna úlken serpilis ákeledi. Mendegi bar málimet boıynsha, elimizde 2,5 mln adamnyń jeke páteri joq. Endi jeńildetilgen nesıe tetikteri iske qosylǵannan keıin turǵyndardyń baspanaly bolýǵa degen múmkindikteri artady. Úı salý qarqyndy júrgizilgenimen, onyń baǵasynyń turǵyndarǵa qoljetimdi bolýyna qatysty únemi másele týyndaıtyn. Óıtkeni, ıpoteka men nesıe talaptarynyń qıyn bolǵany jasyryn emes. Men 7 paıyzben úı satqan bankter týraly buryn sońdy estigen joqpyn. Al Elbasy usynǵan «7 - 20 - 25» baǵdarlamasy arqyly mıllıondaǵan qazaqstandyq óziniń jeke turǵyn úıine qol jetkizedi», - dep túsindirdi Senat tóraǵasynyń orynbasary.
Munan soń senatorlar Ahmet Baıtursynov atyndaǵy QMÝ stýdentterimen júzdesti. Olar bes áleýmettik bastamanyń mańyzdylyǵyn túsindirip, jastar tarapynan qoıylǵan suraqtarǵa jaýap berdi.
